Nuus 07:00

BULLETIN 7 Desember 7 vm

Goeiemôre. Ek is……..

In die bulletin:

# Die ANC vra vir plaaslike eienaarskap van spaza-winkels 
#AfriForum voer druk uit vir aanspreeklikheid in Julius Malema se vuurwapensaak
# En rugby: Die Bulle, Haaie en Stormers verteenwoordig Suid-Afrika in die Kampioenebeker

# Die ANC vra die spaza-winkelsektor moet slegs vir plaaslike inwoners wees. Meer as 51-duisend-788 spaza-winkels is geregistreer, met 45-persent in KwaZulu-Natal. Dit gee township- en landelike ekonomieë ‘n hupstoot. Sekretaris-generaal Fikile Mbalula sê 800 winkels is gesluit met 93-persent in buitelandse besit. Hy versoek die regering om klein ondernemings vir plaaslike inwoners te reserveer om billike ekonomiese geleenthede te verseker:

# Die EFF-leier, Julius Malema moet Maandag weer in die Landdroshof in Oos-Londen verskyn vir slotbetoë in sy vuurwapensaak. AfriForum het klagtes gelê teen Malema nadat hy na bewering ‘n semi-outomatiese geweer afgevuur het op ‘n 2018-saamtrek en ‘n vuurwapen sonder ‘n lisensie besit het. Jacques Broodryk van AfriForum sê Malema het sonder ‘n geldige rede ‘n vuurwapen in die openbaar afgevuur:

# ’n Teenbende-eenheid het op die sekerheidsmaatskappy, Professional Protection Alternatives, naby Paardeneiland in Kaapstad, toegeslaan en beslag gelê op vuurwapens en dokumente. Volgens News24 kom die klopjag enkele dae voor die vermeende huurmoordenaars in die moord op Mark Lifman in die hof verskyn. Lifman, ’n vermeende onderwêreldfiguur, is op 3 November vermoor. Die sekerheidsmaatskappy ontken enige aanspreeklikheid en gee sy samewerking met die ondersoeke. Die polisie vermoed daar is ‘n moontlike verband tussen die vuurwapens waarop beslag gelê is en misdadige bedrywighede, insluitend kontrakmoorde.

# Die Russiese ambassade in Sirië het Russiese burgers gevra om die land te verlaat weens die moeilike militêre en politieke situasie. Hulle word aangeraai om passasiersvlugte te haal op bestaande lughawens. Moskou, wat ‘n sleutel-ondersteuner van die Siriese regering is, het president Bashar al-Assad se regime help versterk. Russiese aanvalle het verlede week die rebelle-beheerde noordwestelike stad Idlib geteiken om rebellemagte te probeer afweer. Oekraïnse intelligensie het vroeër gesê die Russiese president, Vladimir Putin, beplan om huursoldate van privaat militêre maatskappye te stuur om al-Assad te help.

# En rugby: Drie Suid-Afrikaanse spanne speel in die Kampioenebeker-kompetisie, wat beskou word as die hoogtepunt vir klubrugby in die wêreld. Die Haaie is in die eerste ronde om drie-uur vanmiddag gasheer vir die Exeter Chiefs in Durban en die Stormers verwelkom net na vyf-uur Toulon in Gqeberha. Die Bulle het ‘n wegwedstryd in Londen teen Saracens om half-nege vanaand. Toulouse was die vorige seisoen die sesde keer die kampioene.

Bly ingeskakel vir meer nuus……………….