Nuus 07:00

BULLETIN 30 November 7 vm

Goeiemôre. Ek is……..

In die bulletin:

# Die minister van Polisie stel finansiële steun aan wettige mynwerkers voor
# ‘n Onderwysaktivis versoek munisipaliteite om veilige alternatiewe vir penne-neer-partytjies te reël
# En krieket: Die Proteas is in ‘n onaanvegbare posisie op die derde dag van die eerste toets teen Sri Lanka

# Die minister van Polisie, Senzo Mchunu, het finansiële steun voorgestel vir wettige mynwerkers as deel van pogings om onwettige mynbou te bekamp. Mchunu het tydens sy besoek aan Stilfontein in Noordwes, voorgestel die Departement van Minerale en Petroleumhulpbronne kan bystand gee aan diegene wat oor die vaardighede beskik, maar nie die fondse het om wettig te myn nie. Hy het onthul onwettige mynbou vier tans hoogty in sewe provinsies:

# Die onderwysaktivis Hendrick Makaneta het munisipaliteite versoek om veilige en gestruktureerde alternatiewe te reël vir leerders se penne-neer-partytjies. Hy het kommer uitgespreek oor die gevare daaraan verbonde, soos dwelmmisbruik, geweld en mensehandel aangesien daar geen beheer of toesig is nie. Makaneta stel voor munisipaliteite moet alkohol- en dwelmvrye vierings aanbied in veilige plekke met behoorlike toesig en veilige vervoer:

# Die FairPlay-Beweging bevestig ’n voorstel om hoender vry te stel van BTW, is namens die Suid-Afrikaanse Pluimveevereniging en die Vereniging van Vleisinvoerders en -uitvoerders aan die regering voorgelê. Die voorstel is daarop gemik om hoender meer bekostigbaar te maak vir huishoudings met ‘n lae inkomste. Volgens News24 wys die voorstel op die voedingswaarde en ekonomiese voordele, wat wanvoeding en dwerggroei aanspreek.

# Die Britse Laerhuis het ten gunste van ‘n wetsontwerp op bystandsdood vir Engeland en Wallis gestem, sodat die voorgestelde wetgewing na die volgende fase in die parlementêre proses kan vorder. LP’s was met 330 teen 275 ten gunste van wettige genadedood, na ‘n emosionele debat van byna vyf uur. Die wetsontwerp bepaal ŉ persoon se lewensverwagting moet korter as ses maande wees en twee onafhanklike geneeshere moet bevestig of so ŉ persoon in aanmerking kom. ‘n Regter van die Hooggeregshof moet telkens beslis wanneer iemand aansoek doen om hul lewe te beëindig.

# En krieket: Suid-Afrika se kolwers het spel gister oorheers op die derde dag can die eerste toets teen Sri Lanka op Kingspark in Durban. Tristan Stubbs en Temba Bavuma het beide honderdtalle gemoker en die Proteas in ‘n byna onaanvegbare posisie geplaas. Stubbs met 122 en Bavuma met 113 het die boulers van Sri Lanka uitgemergel in ‘n vennootskap om die vierde paaltjie van 249 voor Suid-Afrika hulle tweede beurt gesluit verklaar het op 366 vir vyf. Sri Lanka het teen uitskeityd op 103 vir vyf gestaan in hulle tweede beurt. Die besoekers het 413 lopies nodig om te wen met vyf paaltjies staande.

Bly ingeskakel vir meer nuus……………….