Nuus 07:00

BULLETIN 29 November 7 vm

Goeiemôre. Ek is……..

In die bulletin:

# Suid-Afrika sal hom beywer vir billike handel, skuldverligting en klimaatbefondsing by die G20
# Die DA dien ‘n PAIA-aansoek in oor die minister van Justisie se VBS-verslag
# En rugby: Die Haaie kies die sterkste moontlike span om die Stormers te klop

# President Cyril Ramaphosa sê Suid-Afrika se komende presidentskap van die G20 gaan fokus op die bevordering van regverdige handel, skuldverligting en verhoogde klimaatsbefondsing. Die tema is solidariteit, gelykheid en volhoubaarheid. Ramaphosa het beloof om hom te beywer vir ontwikkelingsvoorkeure in Afrika en die Globale Suide. Hy het aan die Nasionale Raad van Provinsies gesê daar is ‘n behoefte aan sterker globale samewerking om armoede, ongelykheid en klimaatsuitdagings te pak en te verseker weerlose nasies het ‘n stem:

# Die DA het ‘n aansoek ingevolge die Wet op die Bevordering van Toegang tot Inligting ingedien om toegang te verkry tot ‘n verslag wat die minister van Justisie, Thembi Simelane, drie maande gelede aan president Cyril Ramaphosa voorgelê het oor die VBS Bank-skandaal. Dit handel oor ‘n lening van 575-duisend-600-rand wat sy na bewering vir haar Sandtonse koffiewinkel ontvang het. DA-woordvoerder Glynnis Breytenbach kritiseer Ramaphosa se gebrek aan optrede en verwys na openbare belang en ‘n moontlike belangebotsing. Die party glo deursigtigheid is noodsaaklik om vertroue in Suid-Afrika se regstelsel te herstel.

# Die EFF in Gauteng eis die onmiddellike vrystelling van die forensiese ondersoek se verslag oor die Stad Ekurhuleni Behuisingsmaatskappy se onregmatige besteding van 179-duisend-550-rand. Die uitgawe hou verband met die aanstelling van Zingisani Nkamana as hoofspesialis in die Regs- en Prosedure-afdeling van die Wetgewer-departement. Hy was met sy aanstelling ook lid van die Ekurhuleni Behuisingsmaatskappy se raad van direkteure. Die EFF sê Nkamana moet verwyder word en die geld moet teruggegee word.

# Die Oos-Kaapse Departement van Menslike Nedersettings sê hy onderhandel met die Ouditeur-generaal oor geld wat vir behuisingsontwikkeling bedoel is, maar nie gebruik is nie. Die departement het versuim om 99-miljoen van die 231-miljoen-rand te bestee wat hy vir die 2023/2024-boekjaar ontvang het. Nog ‘n agent het 103-miljoen-rand aan die departement teruggegee. Die departement sê hy het onderneem om 160 informele nedersettings in verskeie provinsiale munisipaliteite op te knap.

# Die Britse eerste minister, Keir Starmer, beskuldig die vorige Konserwatiewe regering dat hy ŉ oopgrens-eksperiment bedryf het. In die jaar tot Junie 2023 het 906-duisend mense na die Verenigde Koninkryk migreer wat heelwat hoër is as vroeëre skattings. Altesaam 1,2-miljoen mense het na raming in die jaar tot Junie 2024 in Brittanje aangekom terwyl 414-duisend die land verlaat het. Starmer sê ŉ nuwe witskrif met voorstelle vir wetgewing om immigrasie te verminder, sal binnekort uitgegee word:

# Rugby: Die Haaie gaan môre probeer om nog ‘n oorwinning te behaal oor ‘n gewese Verenigde Rugbykampioenskaps-titelhouer wanneer hulle die Stormers op Kingspark in Durban verwelkom. Hulle het al vir Glasgow Warriors verslaan, en vir Munster wat die vorige seisoen gewen het. Verskeie Springbokke is terug in die span: die stutte Ox Nché en Vincent Kock, kaptein Siya Kolisi, wat die span aanvoer terwyl Eben Etzebeth beseer is, die broers Jaden en Jordan Hendrikse, Makazole Mapimpi, Lukhanyo Am, Aphelele Fassi en Grant Williams. Afskop is 5-uur.

# En die finansiële aanwysers: Die rand verhandel teen 18-rand-8-sent teen die dollar, 19-rand-10-sent teen die euro en 22-rand-97-sent teen die pond. Bitcoin verhandel teen 96-duisend-129-dollar-96-sent. Die prys van goud is twee-duisend-645-dollar per fynons en die prys van Brent ruolie 72-dollar-70-sent per vat.

Bly ingeskakel vir meer nuus……………….