Nuus 07:00

BULLETIN 27 November 7 vm

Goeiemôre. Ek is……..

In die bulletin:

# Die Ouditeur-generaal sê oudit-uitkomste het oor alle regeringsfere verbeter
# ‘n Onderwysaktivis sê die veiligheid van kinders moet ‘n nasionale prioriteit bly
# En Namibiërs gaan vandag stembus toe

# Ouditeur-generaal Tsakani Maluleke sê nasionale en provinsiale regeringsdepartemente toon tekens van verbeterde finansiële en prestasie-bestuur. Sy het die Parlement ingelig oor die nasionale en provinsiale regerings se oudituitkomste in die 2022/2023-boekjaar. Die getal skoon oudits het die afgelope vyf jaar toegeneem van 93 tot 142, wat ‘n verbetering van 24-persent is. Maluleke sê egter daar is te veel entiteite wat nie hul jaarlikse finansiële state betyds indien nie:

# Die onderwysaktivis, Hendrick Makaneta, sê die voortslepende kindersterftes weens voedselvergiftiging is kommerwekkend, selfs al doen die regering stappe om spazawinkels te reguleer en onderliggende maatskaplik-ekonomiese probleme te hanteer. Byna 900 gevalle van voedseloordraagbare siektes wat met spazawinkels verbind word en meer as 20 sterftes is landwyd aangemeld. Makaneta sê kinders se veiligheid en welstand moet ŉ nasionale prioriteit bly en voeg by dis duidelik die huidige maatreëls is nie genoeg om hierdie tragedies te verhoed nie:

# Die DA kritiseer die aanpassingsbegroting vir Gauteng en wys op ŉ toename van 270-persent in die tekort, wat nou op 5,4-miljard-rand staan. Die DA se provinsiale woordvoerder vir Finansies, Ruhan Robinson, waarsku teen dreigende bankrotskap indien fiskale onverantwoordelikheid voortduur. Robinson betreur ook die groeiende e-tolskuld en onbestede fondse. Hy versoek die provinsiale regering om dienslewering, infrastruktuur en fiskale verantwoordelikheid te prioritiseer:

# Namibiërs gaan vandag stem in ‘n algemene verkiesing wat kenners meen vir die eerste keer sedert onafhanklikwording ‘n tweede verkiesing kan veroorsaak. Die voormalige bevrydingsbeweging Swapo regeer sedert 1990, maar het sy twee-derde-meerderheid in 2019 verloor toe sy steun van 87- tot 56-persent gedaal het. Panduleni Itula, wat in 2020 uit die regerende party geskors is, het sedertdien die Independent Patriots for Change gevorm en word beskou as ‘n ernstige aanspraakmaker, nadat hy in 2019 as onafhanklike, 30-persent van die stemme ingepalm het.

# Rugby: Die Ierse span, Connacht, is sonder vier van sy toetsspelers wanneer hulle Saterdag in Galway in die Verenigde Rugbykampioenskap teen die Bulle te staan kom. Bundee Aki, Mack Hansen, Finlay Bealham en Ciaran Prendergast speel vir Ierland in die naweek se toets teen die Wallabies. Die nasionale span het egter Dave Heffernan aan Connacht vrygestel terwyl die Argentynse toetsspeler, Santiago Cordero, ook na sy klub terugkeer. Die Bulle is tans derde op die VRK-punteleer en Connacht vyfde.

# Die finansiële aanwysers: Die rand verhandel teen 18-rand-18-sent teen die dollar, 19-rand-6-sent teen die euro en 22-rand-85-sent teen die pond. Bitcoin verhandel teen 92-duisend-367-dollar-57-sent. Die prys van goud is twee-duisend-633-dollar-13-sent per fynons en die prys van Brent ruolie 72-dollar-68-sent per vat.

# En ten slotte: Die Suid-Afrikaanse pop-ster Tyla is benoem vir agt Billboard-musiektoekennings, insluitend beste vroulike R&B-kunstenaar en beste R&B-liedjie vir Water. Dis die eerste keer dat sy benoem word. Die country-sanger Zach Bryan is in 18 kategorieë benoem en Taylor Swift, die vroulike kunstenaar wat die meeste kere in die toekennings se geskiedenis bekroon is, is 16 keer benoem. Ander benoemdes sluit in Drake, Billie Eilish, Teddy Swims, SZA en Shaboozey. Die toekenningsgeleentheid vind die 12de van volgende maand in Los Angeles plaas.

Bly ingeskakel vir meer nuus……………….