Nuus 07:00

BULLETIN 25 November 7 vm

Goeiemôre. Ek is……..

In die bulletin:

# Malema waarsku EFF-lede om versigtig te wees vir dubbelagente
# Die Finansiële Sektor Gedragsowerheid sê die tweepot-aftreestelsel is ‘n sukses
# En rugby: Pieter-Steph du Toit is vir ‘n tweede keer die Wêreldrugbyspeler van die Jaar

# Die EFF-leier Julius Malema sê faksievorming, onenigheid en dislojaliteit sal nie geduld word in aanloop tot die party se derde National People’s Assembly volgende maand nie. Hy het gister [Sondag] die Gautengse provinsiale sitting in die Oos-Rand toegespreek. Die party gaan gebuk onder ‘n leierskapsuittog met groot name insluitend Floyd Shivambu, Mzwanele Manyi en Dali Mpofu wat by die MK-party aangesluit het. Malema beweer die EFF is deur dubbele agente geïnfiltreer met stigtingslede wat gekaap is:

# Die Finansiële Sektor Gedragsowerheid sê die instelling van die tweepotaftreestelsel was ‘n sukses, met 3,15-duisend-miljard-rand se bates wat deur 887 fondse bestuur is. Die hoof van die owerheid se Aftreefondse-gedragstoesig, Corlia Buitendag, skryf die sukses toe aan samewerking tussen die pensioenfondsbedryf, die Nasionale Tesourie en die Inkomstediens. Sy sê die stelsel het aansienlike onttrekkings beleef, met meer as 35-miljard-rand wat aangevra is, terwyl uitdagings met belastingvoorskrifte, onakkurate data en vertragings steeds hersien word.

# Adjunkpresident Paul Mashatile lei vandag die bekendstelling van die 16 Dae van Aktivismeveldtog in Rustenburg in Noordwes. Die woordvoerder Linah Ledwaba sê die veldtog wil stereotipes uitdaag en geslaggelykheid bevorder, terwyl ‘n beroep gedoen word vir ‘n verenigde poging om geweld teen vroue en kinders stop te sit:

# Die Amerikaanse president Joe Biden sê die COP29-klimaat finansieringsooreenkoms bring die wêreld ‘n stap nader aan die bereiking van sy klimaatsdoelwitte. Lande het ingestem tot ‘n teiken vir lande wat besoedel om 5,4-duisend-miljard-rand teen die jaar 2035 in te samel, om armer lande te help om klimaatsverandering te bekamp en daarby aan te pas. Die ooreenkoms is by die COP29-spitsberaad in Bakoe, Azerbaijan bereik. Die Britse minister van Energie, Ed Miliband, sê die ooreenkoms is ‘n reuse-geleentheid vir die Britse sakesektor om in ander markte te belê.

# Rugby: Die Springbokvoorspeler Pieter-Steph du Toit is as die Wêreld Rugbyspeler van die jaar aangewys en hy het die eerste Suid-Afrikaner geword om die toekenning vir ‘n tweede keer te verower. Hy sluit hom aan by Beauden Barrett van Nieu-Zeeland as ‘n dubbele wenner met die All Black grotes, Dan Carter en Richie McCaw wat dit elk drie keer reggekry het. Die afrigter Rassie Erasmus het die Afrigter van die Jaar-toekenning misgeloop wat na Frankryk se Sewes-afrigter, Jérôme Daret gegaan het. Die skrumskakel Sacha Feinberg-Mngomezulu het die Deurbraakspeler van die Jaar misgeloop wat aan Wallace Sititi van Nieu-Zeeland toegeken is.

# Die finansiële aanwysers: Die rand verhandel teen 18-rand-1-sent teen die dollar, 18-rand-88-sent teen die euro en 22-rand-69-sent teen die pond. Bitcoin verhandel teen 97-duisend-688-dollar-80-sent. Die prys van goud is twee-duisend-702-dollar-6-sent per fynons en die prys van Brent ruolie 74-dollar-94-sent per vat.

# En ten slotte: Die DA betreur die dood van die bekende Suid-Afrikaanse digter, romanskrywer, skilder en aktivis Breyten Breytenbach. Hy is gister in die ouderdom van 85 in Parys oorlede. Breyten is in 1975 vir verraad teen die apartheidsregering gevangenisstraf opgelê en het sewe jaar in die tronk deurgebring. Die DA sê sy digkuns het nog altyd ‘n diep menslikheid weerspieël wat ‘n uitdrukking van sy waardes en sy aard was. Die party sê Breytenbach was een van die bestes.

Bly ingeskakel vir meer nuus……………….