Nuus 07:00

BULLETIN 22 November 7 vm

Goeiemôre. Ek is……..

In die bulletin:

# Die Presidensiële Infrastruktuurkommissie veroordeel afpersing op boupersele
# Everest Wealth sê die rentekoersverlaging is ‘n hupstoot vir die feestyd
# En die Europese Unie sê die beslissing van die Internasionale Strafhof moet gerespekteer word

# Die Raad van die Presidensiële Infrastruktuurkommissie sê misdaad en afpersing op boupersele moet ten sterkste veroordeel word. President Cyril Ramaphosa was die voorsitter van die raad se inwydingsitting om onder meer ‘n plan van aksie teen misdaad en afpersing te bespreek asook prioriteitsinfrastruktuurpropjekte. Daar is tans 82 geïntegreerde projekte van 437-miljard-rand wat in aanbou is. Die raad sê wetstoepassing moet meer hulpbronne kry om misdadige bedrywighede op boupersele te bekamp en beleidshervorming in die boubedryf moet vooropgestel word.

# BetterBond verwelkom die verlaging van die terugkoopkoers van 25 basispunte tot 7,75-persent. Die hoof van verkope, Bradd Bendall, sê die verlangsaming van inflasie bevorder ‘n gunstiger uitleenomgewing deur die neiging van koersverlagings voort te sit. Volgens Bendall bied die besluit verligting vir huiseienaars wat sedert November 2021 gebuk gaan onder stygende verbandkoste. BetterBond berig daar is ‘n verbetering van 30-persent in huisleningsaktiwiteite in Oktober, wat dui op ‘n herstel van die eiendomsmark:

Die uitvoerende hoof van Everest Wealth, Thys van Zyl, sê intussen die rentekoersverlaging bied verligting vir verbruikers en bevorder besteding voor die feestyd. Volgens Van Zyl is dit ten spyte van die verlaging ŉ verspeelde geleentheid vir groter ekonomiese momentum. Hy meen ŉ verlaging van 50 basispunte sou groter uitwerking gehad het. Van Zyl verwag verdere verlagings in Januarie en Maart, wat die besteebare inkomste sal verhoog. Hy glo daar is moontlik ŉ verbetering in sakevertroue, beleggersentiment en kredietvooruitsigte te midde van tekens van ekonomiese herstel.

# Die Hooggeregshof in Johannesburg het die direkteur van Sondolo IT, Trevor Mathenjwa, se voorverhoordatum in die saak wat met BOSASA verbind word, vasgestel vir 7 Februarie volgende jaar. Mathenjwa staan tereg op korrupsie-aanklagte van meer as 300-duisend-rand, wat saam met wyle Dudu Myeni gepleeg is. Sy het na bewering geld van Bosasa se filiaal, Sondolo IT, ontvang, wat deur Mathenjwa aangebied is. Die Onafhanklike Ondersoekdirektoraat se woordvoerder, Henry Mamothame, sê Mathenjwa is tans uit op borgtog van tien-duisend-rand:

# Die Europese Unie se hoof van Buitelandse Beleid, Joseph Borrell, sê die uitsprake van die Internasionale Strafhof is nie polities nie en moet toegepas word. Sy opmerking volg na die hof lasbriewe vir inhegtenisname van die Israeliese eerste minister Benjamin Netanyahu, die voormalige minister van Verdediging, Yoav Gallant en die Hamas militêre leier, Mohammed Deif uitgereik het. Die hof sê daar is redelike gronde dat die drie mans misdadige verantwoordelikheid dra vir beweerde misdade teen die mensdom in die oorlog tussen Israel en Hamas. Borrell sê die beslissing moet gerespekteer word:

# Gholf: Wynand Dingle het met sewe onder baansyfer 65 geopen om die eerste ronde met Stals Swart te deel in die Suid-Afrikaanse PGA-kampioenskap op St Francis Links in die Oos-Kaap. Hulle het is albei twee houe voor hulle naaste teenstanders, Estiaan Conradie, Heinrich Brjiners en JJ Senekal. Die driemalige wenner Jaco van Zyl het met ‘n ronde van vier onder baansyfer 68 geopen. Hy mik om by Harold Henning aan te sluit om die enigste ander speler te word wat Suid-Afrika se tweede oudste beroepstoernooi vier keer kon wen.

# En die finansiële aanwysers: Die rand verhandel teen 18-rand-8-sent teen die dollar, 18-rand-93-sent teen die euro en 22-rand-76-sent teen die pond. Bitcoin verhandel teen 98-duisend-210-dollar-40-sent. Die prys van goud is twee-duisend-678-dollar-34-sent per fynons en die prys van Brent ruolie 74-dollar-55-sent per vat.

Bly ingeskakel vir meer nuus……………….