Nuus 07:00

BULLETIN 18 November 7 vm

Goeiemôre. Ek is……..

In die bulletin:

# Die regering wil die Nasionale Padveiligheidstrategie hersien
# Rusland voer sy grootste missiel- en hommeltuigaanval op Oekraïne uit
# En motorsport: Jorge Martin is die 2024 MotoGP-wêreldkampioen

# Die adjunkminister van Vervoer, Mkhuleko Hlengwa, sê die regering wil die Nasionale Padveiligheidstrategie hersien in ‘n poging om padsterftes te verminder. Hy het gister in Pretoria hulde gebring aan 69 verkeersbeamptes wat hulle lewens verloor het terwyl hulle op diens was. Hlengwa sê hulle sal op die mediumtermyn fokus op opvoeding oor padveiligheid, ingenieurswese en wetstoepassing. Hy sê tien lande het verlede jaar padsterftes met meer as 50-persent verminder wat ŉ standaard stel wat Suid-Afrika kan nastreef.

# Die DA sê hy het aan die Spesiale Ondersoekeenheid geskryf oor sy ondersoek na die 840-miljoen-rand Wilge-woonkompleks naby die Kusile-kragstasie in Mpumalanga, wat Eskom agtergelaat en totaal verwaarloos het. Kevin Mileham van die party sê die DA het ‘n opdatering gevra oor die vordering met die ondersoek, weens onthullings oor hoe ernstig en blatant Eskom se geldmors was:

# Die mynwerkersvakbond NUM vra die minister van Minerale en Petroleumbronne Gwede Mantashe om alle mynboulisensies van Seriti Resources te herroep en dit aan mynmaatskappye te gee wat mynwerkers permanent sal aanstel. Bizzah Motubatse van NUM sê die vakbond het besluit om die Arbeidshof te nader oor Seriti Resources se besluit om een-duisend-143 werkers in Mpumalanga af te dank:

# Die ANC in Gauteng woon vandag die hofsaak in die Benoni-landdroshof in Ekurhuleni by wat verband hou met die Waarheid- en Versoeningskommissie se saak van die studente-aktivis, Caiphus Nyoka. Meer as 37 jaar nadat Nyoka in 1987 dood is, het die gewese polisiebeampte uit die apartheid-era, Johan Marais, verlede week skuldig gepleit op sy moord. Die 65-jarige Marais en twee ander staan tans tereg. Die ANC sê hy ondersteun steeds geregtigheid vir slagoffers van die apartheidsera en sal die slagoffers se families bystaan.

# Rusland het sy grootste lugaanval sedert September op Oekraïne uitgevoer. Minstens tien mense is dood en energie-infrastruktuur is beskadig in die hoofstad Kiev, Donetsk, Lviv en Odesa. Altesaam 120 missiele en 90 hommeltuie is gebruik. Oekraïne se grootste privaat energiemaatskappy, DTEK, sê sy termiese kragaanlegte het aansienlike skade opgedoen wat nood-kragonderbrekings veroorsaak het. Oekraïne se president Volodymyr Zelensky beskryf die bomaanvalle as Russiese terroriste se werk. Hierdie aanval is die agste grootskaalse een op Oekraïnse energie-fasiliteite.

# Motorsport: Jorge Martin van Prima Pramac Racing het sy eerste MotoGP-wêreldkampioenskapstitel gewen nadat hy Sondag derde geëindig het in die seisoen se laaste wedren in Barcelona. Die Italianer Francesco Bagnaia het die dag begin met agterstand van 19, maar ŉ oorwinning by die Circuit de Barcelona-Catalunya was nie genoeg om die Spanjaard in te haal nie. Martin se 32 podiumplekke in snel- en wedrenne het hom ŉ voorsprong van tien punte en die titel verseker. Die Suid-Afrikaner, Brad Binder, was vyfde in die kampioenskap. Martin sê dis spesiaal om die kampioenskap te wen:

# En die finansiële aanwysers: Die rand verhandel teen 18-rand-14-sent teen die dollar, 19-rand-11-sent teen die euro en 22-rand-91-sent teen die pond. Bitcoin verhandel teen 90-duisend-757-dollar-84-sent. Die prys van goud is twee-duisend-586-dollar-42-sent per fynons en die prys van Brent ruolie 71-dollar-17-sent per vat.

Bly ingeskakel vir meer nuus……………….