Nuus 07:00

BULLETIN 2 Desember 7 vm

Goeiemôre. Ek is……..

In die bulletin:

# Mashatile vra gemeenskappe om leiding te neem in die stryd teen MIV/Vigs [KLANK]
# SA ondernemings teken verhoogde inkomste en verbeterde produktiwiteit aan ná vier dae-week-proeflopie
# En, rugby: Plaaslike spanne op volle sterkte vir die naweek se VRK-wedstryde

# Adjunkpresident Paul Mashatile het gemeenskappe gevra om leiding te neem in die stryd teen die MIV/Vigs-pandemia. Hy het die amptelike Wêreld-Vigsdag-geleentheid in KwaZulu-Natal toegespreek. Mashatile het ook gevra vir die beskerming van tienermeisies, want die jongste statistiek toon hulle is weerloos teen besmetting: 

# Suid-Afrika het die vier-daagse werkweek suksesvol getoets, met 26 deelnemende ondernemings wat beduidende voordele vir beide werknemers en werkgewers aangeteken het. Die proeflopie, wat ses weke geduur het, het verhoogde inkomste, beter produktiwiteit, minder bedankings en minder afwesigheid getoon. Werknemers het verbeterde welstand, minder stres en ‘n beter werk-lewe-balans ervaar. Die positiewe uitkomste stem ooreen met globale ervarings, en 92-persent van die deelnemende ondernemings het hul voorneme uitgespreek om voort te gaan met die vier-daagse werkweek-model. Die sukses het veroorsaak dat daar oorweeg word om dit meer gereeld te doen.

# Die DA in Gauteng is bekommerd oor die bestuur van Johannesburg deur die koalisie van die ANC, EFF en Patriotic Alliance. Die party is gekweld oor die stad se stryd met befondsing van infrastruktuur, asook met beweerde onreëlmatige aanstellings. Die DA-woordvoeder Belinda Kayser-Echeozonjoku sê omdat die nasionale regering weier om ‘n noodtoestand te verklaar, moet belastingbetalers nou instaan vir 178-miljoen-rand se herstelwerk na die ontploffing in Lilian Ngoyi-straat. Sy bevestig die DA is verbind om te verseker daar is verantwoordbaarheid:

# Die menseregtegroep, Africa4Palestine, het die aankoms van verskeie Palestynse weerstandsorganisasies in Suid-Afrika verwelkom vir die vyfde Wêreldwye-konvensie-vir-solidariteit met Palestina, wat in Johannesburg gehou word. Die tema is – “Nelson Mandela en Palestina- Om rassisme te konfronteer tot bevryding,” en herdenk Mandela se dood tien-jaar gelede. Die organiseerders sê meer as 150 afgevaardigdes van 72 lande sal maniere bespreek om internasionale solidariteit met Palestina en sy wettige stryd te versterk. Die afvaardigings sal ook belangrike inligting verskaf oor die huidige vyandelikhede in Gaza.

# En, laastens, rugby: Al die plaaslike spanne in die Verenigde Rugbykampioenskap sal hierdie naweek op volle sterkte wees ná die terugkeer van hul Springbok Wêreldbeker-wenners. Die Bulle en die Haaie sal vanmiddag om drie-uur op Loftus mekaar die stryd aansê, en om vyfuur sal die Leeus, Wallis se Dragons op Ellispark verwelkom. Net ná sewe-uur sal die Stormers en die Italiaanse span, Zebre, mekaar in Stellenbosch pak. Die Bulle is tans derde op die puntelys, die Leeus is tiende, die Stormers, 12de en die Haaie 14de.

Bly ingeskakel vir meer nuus……………….