Nuus 06:00

BULLETIN 25 September 6 vm

Goeiemôre. Ek is……..

In die bulletin:

# President Ramaphosa lig Suid-Afrika se grootste bedreigings uit
# Die Verkiesingskommissie sê ‘n onafhanklike pers is die grondslag van vrye en regverdige verkiesings
# En krieket: Matthew Breetzke lei Suid-Afrika tot ‘n oorwinning oor Australië in die eerste eendagwedstryd

# President Cyril Ramaphosa het Suid-Afrikaners gevra om te waak teen kragte wat die nasionale eenheid ondermyn. Hy het gister die hoofrede gelewer tydens die nasionale viering van Erfenisdag by die Bongolethu-sportstadion in Oudtshoorn, Wes-Kaap. Ramaphosa het gesê apartheid was in die verlede die land se gemeenskaplike vyand, terwyl die vyand vandag werkloosheid, geslagsgeweld, korrupsie en alkohol- en dwelmmisbruik is. Hy sê die waardes van eenheid, ubuntu en menswaardigheid, wat die nasie saamsnoer, moet versterk word:

# Die Verkiesingskommissie sê ‘n onverhinderde, onafhanklike media is ‘n grondliggende pilaar van vrye en regverdige verkiesings. Artikel 8 van die Verkiesingsgedragskode sit die streng verhouding tussen politieke partye, kandidate en die nuusmedia ondubbelsinnig uiteen. Die voorsitter van die OVK, Mosotho Moepya, het politieke leiers en kandidate versoek om joernaliste te beskerm en hulself te weerhou van enige teistering of dreigemente teen die media; fisies van aard by verkiesingsbyeenkomste of digitaal aanlyn. Hy sê joernaliste mag nooit by politieke byeenkomste uitgesonder word op maniere wat skadelike gedrag kan uitlok nie.

# Die ANC het die geskorste nasionale polisiekommissaris, Fanie Masemola, beskuldig dat hy sy grondwetlike plig versuim het deur nie op te tree teen die geskorste polisieminister, Senzo Mchunu, se opdrag om by misdaadintelligensie-aanstellings in te meng nie. Dit is ‘n voorlegging deur die party terwyl die ad hoc-komitee wat bewerings van misdadigheid in die polisiediens ondersoek, oor sy konsepverslag beraadslaag. Khuselo Diko van die ANC sê Masemola moes Mchunu se opdrag geweier het om ‘n moratorium op misdaadintelligensie-aanstellings te plaas:

# Die EFF sê AfriForum se meedoënlose politieke vervolging van Julius Malema het ‘n ongekende laagtepunt bereik deur die regstelsel as wapen te gebruik. Die Nasionale Vervolgingsgesag het besluit om Malema vir crimen injuria te vervolg na aanleiding van sy verkragtingsbewerings teen die voormalige hoof van Bergview College, Jaco Pieterse. Die saak het betrekking op die beweerde verkragting van ‘n sewejarige meisie in Oktober 2024. AfriForum het ‘n strafsaak teen Malema aanhangig gemaak. Die EFF sê die NVG se voortsetting van hierdie saak, op aandrang van AfriForum, vorm deel van ‘n wraaksugtige ideologiese agenda deur regsgesindes.

# Die Australiese regering het begin met ‘n ondersoek nadat ‘n OpenAI-agent by ‘n nasionale gesondheidsorgdatabasis ingebreek en ongemagtigde toegang tot die land se Medicare-statistiekdatabasis verkry het. Dit is die eerste bekende geval waar kunsmatige intelligensie by ‘n regeringsnetwerk ingebreek het. Die voorval het in Junie plaasgevind, maar OpenAI is eers in Augustus daarvan in kennis gestel. Die Australiese eerste minister, Anthony Albanese, sê die ondersoek sal bepaal of bestaande wetgewing en bestuursprosesse geskik is om kubervoorvalle waar kunsmatige intelligensie gebruik word te hanteer:

# Krieket: ‘n Honderdtal deur Matthew Breetzke het die Proteas gehelp om Australië met 67 lopies in die eerste eendagwedstryd op Kingsmead in Durban te klop en ‘n voorsprong van 1-0 in die reeks van drie wedstryde te neem. Breetzke het die Suid-Afrikaner met die meeste lopies in sy eerste 14 eendagwedstryde geword deur 112 lopies van 106 balle aan te teken, met die tuisspan wat ‘n totaal van 297 vir agt behaal het. Hierna het die linkshandige draaiboulers Keshav Maharaj en Bjorn Fortuin ses paaltjies tussen hulle verdeel en Australië vir 230 lopies uitgeknikker. Die tweede eendagwedstryd word Sondag op die Wanderers gespeel.

# En die finansiële aanwysers: Die rand verhandel teen 16-rand-41-sent teen die dollar, 18-rand-61-sent teen die euro en 21-rand-67-sent teen die pond. Bitcoin verhandel teen 84-duisend-135-dollar. Die prys van goud is vier-duisend-272-dollar-25-sent per fynons en die prys van Brent-ruolie 104-dollar-81-sent per vat.

Bly ingeskakel vir meer nuus……………….