Nuus 06:00

BULLETIN 29 September 6 vm

Goeiemôre. Ek is……..

In die bulletin:

# Die DA sê minister Tau sleep sy voete terwyl die krisis by die Buro vir Standaarde verdiep
# President Ramaphosa tree glo in met Kenny Kunene se heraanstelling
# En motorsport: Marc Márquez verower sy sewende MotoGP-titel

# Die DA sê hy is bekommerd oor die vertraging in die ondersoek na wanadministrasie by die Suid-Afrikaanse Buro vir Standaarde. Toby Chance van die DA sê in Februarie vanjaar het die minister van Handel, Nywerheid en Mededinging, Parks Tau, onder die druk van die Demokratiese Alliansie, TSU International aangestel om bewerings van wanadministrasie by die SABS te ondersoek wat verlede Augustus na vore gekom het. Hy sê die TSU se verslag sou teen die einde van Junie ingedien word:

# Die Activists and Citizens Forum sê die getuienis van die hoof van polisieregsdienste, Marga Van Rooyen, het weer eens die ondoeltreffendheid van parlementslede blootgelê. Woordvoerder Dennis Bloem sê Van Rooyen het aan die Madlanga-kommissie gesê die Parlementêre portefeuljekomitee oor Polisie het versuim om volgens sy mandaat op te tree om nie die bewerings wat die KwaZulu-Natalse provinsiale polisiekommissaris Nhlanhla Mkhwanazi in Maart vanjaar voor die komitee gemaak het, te ondersoek nie:

# Die minister van Vervoer, Barbara Creecy, het die herverkiesing van Suid-Afrika tot die Internasionale Burgerlugvaartorganisasie se Bestuursraad verwelkom tydens die 42ste Algemene Vergadering wat tans in Montreal, Kanada, plaasvind. Die departement se woordvoerder, Collen Msibi, sê die stemming het Saterdag plaasgevind, en Suid-Afrika is herkies in Deel II van die Algemene Raad, ‘n kategorie waar lidstate hoër verteenwoordiging ontvang by globale forums wat handel oor burgerlike lugvaart:

# President Cyril Ramaphosa het na wat berig word ingegryp om die herstel van die Patriotic Alliance se Kenny Kunene as Johannesburg se burgemeesterskomiteelid vir Vervoer te verseker. Kunene is Vrydag weer as raadslid ingehuldig nadat hy vrywillig as ‘n burgemeesterskomiteelid bedank het nadat hy betrek is by die moordbeskuldigde Katiso “KT” Molefe. Volgens TimesLIVE het die ANC se nasionale leierskap gelas dat Kunene teen Dinsdag in sy vervoerportefeulje herstel word, wat ‘n beplande uitruiling van burgemeesterskomiteeposisies tussen die PA en EFF stopsit.

# Die Verenigde Nasies het ‘n wapen-embargo en ander sanksies teen Iran herstel oor sy kernprogram. Dit volg na aanleiding van ‘n proses deur Europese moondhede waarvolgens Teheran gewaarsku is dat streng reaksie sal volg. Brittanje, Frankryk en Duitsland het begin met die herinstelling van sanksies teen Iran by die VN-Veiligheidsraad. Dit gaan oor beskuldigings dat hy ‘n 2015-ooreenkoms oortree het wat die ontwikkeling van ‘n kernbom verbied. Iran ontken dat hy kernwapens het. Intussen het Iran sy ambassadeurs in Brittanje, Frankryk en Duitsland teruggeroep vir samesprekings.

# Motorsport: Die Spaanse Ducati-renjaer Marc Márquez het sy sewende MotoGP-wêreldkampioenskap by die Japannese Grand Prix verseker, sy eerste sedert 2019. Die 32-jarige het tweede in Motegi geëindig agter sy spanmaat Francesco Bagnaia om die titel te beklink. Honda se Joan Mir was in die derde plek. Brad Binder van Suid-Afrika was 12de. Márquez, wat 11 oorwinnings hierdie seisoen behaal het en sy kampioenskapsvoorsprong tot 201 punte bo sy broer Álex gerek het, sê geestelik was dit die moeilikste titel om te behaal:

# En die finansiële aanwysers: Die rand verhandel teen 17-rand-33-sent teen die dollar, 20-rand-29-sent teen die euro en 23-rand-25-sent teen die pond. Bitcoin verhandel teen 112-duisend-132-dollar. Die prys van goud is drie-duisend-769-dollar-41-sent per fynons en die prys van Brent ruolie 68-dollar-44-sent per vat.

Bly ingeskakel vir meer nuus……………….