Nuus 06:00

BULLETIN 27 Augustus 6 vm

Goeiemôre. Ek is……..

In die bulletin:

# Die ANC verwerp bewerings dat die nasionale dialoog partygedrewe is
# Die Parlement se Justisiekomitee is bekommerd oor die vertraging met die Madlanga-kommissie
# En Bester en Magudumana dien ‘n dringende hofaansoek in om die vrystelling van ‘n Netflix-dokumentêr te stop

# Die ANC verwerp bewerings dat die nasionale dialoog deur die party aangedryf word. Hy dring aan dat die proses onpartydig is en bedoel is om konsensus te bou oor Suid-Afrika se dringende sosio-ekonomiese uitdagings. Die sekretaris-generaal van die ANC, Fikile Mbalula, het die media meegedeel dat die dialoog ‘n nasionale inisiatief is wat beoog om armoede, werkloosheid, en ongelykheid aan te spreek, en sal alle sektore van die gemeenskap betrek. Mbalula sê om die proses as ‘n ANC-projek voor te stel, ondermyn pogings om eenheid te bou en inklusiewe oplossings te vind:

# RISE Mzansi sê die minister van Justisie, Mmamoloko Kubayi, moet voor die Parlement se Portefeuljekomitee oor Justisie en Grondwetlike Ontwikkeling verskyn om vertragings met die Madlanga-kommissie van Ondersoek te verduidelik. Mabine Seabe van die party beskuldig Kubayi omdat sy versuim het om behoorlike toesig te verskaf om te verseker die kommissie het genoeg hulpbronne om op 1 September te begin werk. Die party verwelkom optrede teen senior amptenare en dring aan op aanspreeklikheid en ‘n nuwe datum vir wanneer die kommissie sal begin:

Die parlementêre portefeuljekomitee oor Justisie en Grondwetlike Ontwikkeling sê intussen hy is ook bekommerd oor die vertraging van die werksaamhede van die Madlanga-kommissie van Ondersoek wat bewerings van misdadigheid, politieke inmenging en korrupsie in die strafregstelsel moet ondersoek. Verkrygingsvertragings het die kommissie gedwing om sy verhore uit te stel. Die kommissie sê dit is kommerwekkend dat die vertraging blykbaar te wyte is aan staatsamptenare wat nie hul verantwoordelikhede nakom nie.

# Die veroordeelde verkragter en moordenaar, Thabo Bester, en Nandipha Magudumana het ‘n dringende hofaansoek ingedien om die vrystelling van die Netflix-dokumentêr Beauty and the Bester te belet. Die reeks in drie dele, wat volgende maand vrygestel sal word, herleef die 2023-skandaal, van Bester se tronkontsnapping tot die paartjie se inhegtenisneming in Tanzanië. Die dokumentêr kyk ook na die opkoms en ondergang van die bekende dokter Magudumana. Bester se regsverteenwoordigers sê hul kliënt betwis die akkuraatheid, billikheid en wettigheid van die dokumentêr.

# Die ministerie van Binnelandse Sake in Brittanje het ingestem om immigrasiereëlings aan te pas om studente uit Gaza te help om volgende maand volledig-befondsde plekke in universiteite in die Verenigde Koninkryk te bekom. Studente sal glo toegelaat word om biometriese toetse in ‘n derde land te ondergaan voor hulle na die VK reis. Die Israelse regering sal egter steeds toestemming moet gee vir elke student wat Gaza verlaat, aangesien diplomatieke betrekkinge met Londen besig is om te versleg. Die eerste minister Keir Starmer het verlede maand aangekondig die VK sal ‘n Palestynse staat erken.

# Gholf: Die wenner van volgende jaar se Suid-Afrikaanse Ope sal ‘n uitnodiging kry na die Amerikaanse Meesterstoernooi. Die toernooi begin op 26 Februarie in Stellenbosch in die Wes-Kaap en sal waarskynlik ook deel bly van die kwalifiseringsreeks vir die 154ste Britse Ope. Dit beteken ‘n regstreekse roete vir lede van die Sonskyntoer na twee van die mees ikoniese Major-toernooie. Toer-kommissaris Thomas Abt beskryf dit as verdere erkenning van die toer as ‘n waardevolle lid van die internasionale gholf-ekostelsel.

# En die finansiële aanwysers: Die rand verhandel teen 17-rand-62-sent teen die dollar, 20-rand-51-sent teen die euro en 23-rand-74-sent teen die pond. Bitcoin verhandel teen 111-duisend-960-dollar. Die prys van goud is drie-duisend-391-dollar-97-sent per fynons en die prys van Brent ruolie 66-dollar-61-sent per vat.

Bly ingeskakel vir meer nuus……………….