Nuus 06:00

BULLETIN 2 April 6 vm

Goeiemôre. Ek is……..

In die bulletin:

# Die parlementêre finansiële komitee aanvaar die fiskale raamwerkverslag
# ActionSA sê die BTW-verhoging en inkorting van die belastingraamwerk is geskrap
# En Suid-Afrika wil met die VSA praat oor motoruitvoere

# Die parlementêre staande komitee oor Finansies het die fiskale raamwerkverslag met aanbevelings aanvaar wat die grondslag lê vir vandag se parlementsitting. Dit volg nadat die ANC ‘n voorstel van ActionSA ondersteun het om die begroting te wysig deur die verhoging van 0,5-persent in BTW te verwyder en persoonlike inkomstebelastingbetalers volledige verligting vir inflasie te gee. Die voorstel sluit in ‘n 30-dae verlangsaming van die begrotingsproses waartydens die Nasionale Tesourie die fiskale raamwerk sal oordoen.

ActionSA sê intussen hy het Suid-Afrikaners beskerm teen buitensporige belasting en toenemende ekonomiese druk. Dit volg nadat die party ‘n voorstel in die fiskale raamwerkverslag gedoen het wat verseker het dat die verhoging van 0,5-persent in BTW vir die 2025/2026-boekjaar geskrap word. Athol Trollip van ActionSA sê hulle het verseker ‘n plaasvervangende inkomstevoorstel en ooreenstemmende uitgawebesparings word oorweeg, sodat daar vergoed word vir die tekort van 28-miljard-rand as gevolg van die skrapping van belastingverhogings:

# Die minister van Handel, Nywerheid en Mededinging, Parks Tau, sê hulle sal gesprek voer met Amerikaanse owerhede oor Washington se besluit om ‘n 25-persent tarief op motor- en motoronderdeel-invoere te hef. Hy waarsku die stap kan die Suid-Afrikaanse ekonomie benadeel, met voertuiguitvoere wat 64-persent van die Wet op Groei en Geleenthede in Afrika uitmaak. Die regering sal ook die impak met die plaaslike voertuigbedryf bespreek. Die tariewe tree in April en Mei in werking, met slegs Mexiko en Kanada wat vrygestel is.

# Eskom en die Emfuleni Plaaslike Munisipaliteit in Gauteng het ‘n belangrike mylpaal bereik met die munisipaliteit wat sy elektrisiteitsrekening vir die eerste keer in maande ten volle betaal het. Dit volg na die ondertekening van die verspreidingsagentskap-ooreenkoms in Oktober wat Eskom die diensverskaffer gemaak het. Eskom se streekswoordvoerder, Amanda Qithi sê die vennootskap het tot hoër betaalvlakke gelei, het voorsieningbetroubaarheid verbeter, en infrastruktuuronderhoud verbeter:

# Denemarke het gevra vir ‘n verenigde EU-reaksie op Amerikaanse waarskuwings teen die gebruik van diversiteitsprogramme in Europese ondernemings, nadat die Amerikaanse president Donald Trump belowe het om dit uit te roei. ‘n Hele paar Franse ondernemings wat in die Verenigde State sake doen of wil doen, sowel as verskeie Deense ondernemings het briewe van Amerikaanse ambassades ontvang, met ‘n vraelys aangeheg, waarin hulle gevra word om te verklaar hulle beoefen nie “programme om diversiteit, gelykheid en insluiting te bevorder” nie. Hierdie programme is ontwerp om geleenthede te bied aan mense van kleur, vroue en ander groepe wat geskiedkundig uitgesluit is.

# Motorsport: Red Bull verwag sy nuwe renjaer, Yuki Tsunoda, moet net so na as moontlik aan die Nederlandse wêreldkampioen, Max Verstappen, bly in die naweek se Grand Prix in sy vaderland, Japan. Dit volg nadat hy Liam Lawson van Nieu-Seeland na net twee wedrenne vervang het. Red Bull se spanbestuurder, Christian Horner, het Tsunoda aangesê om te probeer om die span te help, wat tans derde in die vervaardigers-kampioenskap is. Die 24-jarige sê hy sal tevrede wees om net onder die voorste tien te eindig in Suzuka.

# En die finansiële aanwysers: Die rand verhandel teen 18-rand-45-sent teen die dollar, 19-rand-90-sent teen die euro en 23-rand-87-sent teen die pond. Bitcoin verhandel teen 85-duisend-148-dollar-30-sent. Die prys van goud is drie-duisend-112-dollar-74-sent per fynons en die prys van Brent ruolie 74-dollar-52-sent per vat.

Bly ingeskakel vir meer nuus……………….