Nuus 06:00

BULLETIN 10 Desember 6 vm

Goeiemôre. Ek is……..

In die bulletin:

# Die DA versoek die minister van Vervoer om die brandstofkrisis by OR Tambo te ondersoek
# Minister Groenewald sê 36-miljard-rand is nodig om die oorbevolking in  tronke te bekamp
# En die Padvragvereniging sê die Mosambiekse krisis moet opgelos word

# Die DA het ‘n beroep gedoen op die minister van Vervoer, Barbara Creecy, om ‘n volledige ondersoek van stapel te stuur na die krisis met stralerbrandstof-voorrade by die OR Tambo Internasionale Lughawe. Die DA se woordvoerder vir Vervoer, Chris Hunsinger, het die mislukking beskryf as ‘n katastrofiese slag vir Suid-Afrika se toerismebedryf sowel as vir beleggersvertroue. Hunsinger eis aanspreeklikheid. Jabulani Khambule van ACSA het intussen in gesprek met die SABC gesê die agterstand is ingehaal:

# Die minister van Korrektiewe Dienste, Pieter Groenewald, beklemtoon die dringende behoefte aan 36-miljard-rand om nuwe tronke te bou en die oorbevolking van 46-persent in gevangenisse te verminder. Hy sê oorbevolking word vererger omdat borgtog onbekostigbaar is. Groenewald sê bedruimte het tussen September 2023 en Julie vanjaar met twee-duisend-788 toegeneem. Die land het egter 50-duisend meer beddens nodig om die druk te verlig. Groenewald sê die Departement van Korrektiewe Dienste is besig met 69 infrastruktuurprojekte, insluitend nuwe gevangenisse in Burgersdorp en Parys wat teen 2026 gereed sal wees.

# Die Suid-Afrikaanse Menseregtekommissie versoek die insluiting van Hoofstuk 9-instellings in toekomstige raadplegings oor die Wysigingswet op Basiese Onderwyswette. Die kommissie het sy ontevredenheid oor sy uitsluiting van besprekings oor klousule vier en vyf te kenne gegee, wat aandag skenk aan leerderinskrywings en taalbeleid in skole. Die instel van hierdie klousules is uitgestel. Die BELA-wet, wat in September onderteken is, het ten doel om onderwysbestuur te verbeter, maar wek kommer, veral oor die uitwerking daarvan op Afrikaanse skole.

Die premier van Gauteng, Panyaza Lesufi het intussen president Cyril Ramaphosa versoek om die laaste twee oorblywende klousules in die Wysigingswet op Basiese Onderwyswette te onderteken, ondanks teenkanting deur die DA. Hy het gister die Gautengse konferensie van die ANC-jeugliga in Boksburg toegespreek. Die twee omstrede klousules handel oor taal- en toelatingsbeleid in openbare skole. Lesufi het opnuut onderneem om te verseker alle kinders het toegang tot gehalte-onderwys, ongeag hul taalvaardigheid of die kleur van hul vel:

# Die Padvragvereniging sê Suid-Afrika moet voorrang gee aan diplomatieke pogings om die krisis in Mosambiek op te los. Politieke onrus ontwrig belangrike handelsroetes, veral die hawe van Maputo, en dit stel nywerhede wat van hierdie voorraadketting afhanklik is in gevaar. Die uitvoerende hoof van die vereniging, Gavin Kelly, versoek president Cyril Ramaphosa om in te gryp om bestendigheid te verseker en te keer dat Suid-Afrika en die SAOG-streek ekonomies in duie stort:

# Rugby: Die Springbokke Manie Libbok en Ben-Jason Dixon gaan die Stormers se volgende wedstryd misloop terwyl hulle herstel van harsingskudding wat hulle in die naweek se Kampioenebeker-nederlaag teen Toulon in Gqeberha opgedoen het. Keke Morabe gaan lank uit wees weens ‘n gebreekte been, en is gister geopereer. Die unie sê die Bokke Salmaan Moerat, Frans Malherbe, Deon Fourie en Sacha Feinberg-Mngomezulu, sowel as Sti Sithole, sal hopelik voor die einde van die maand terugkeer, maar die ander Bokke, Steven Kitshoff, Evan Roos en Damian Willemse, sal langer buite aksie wees.

# En die finansiële aanwysers: Die rand verhandel teen 17-rand-78-sent teen die dollar, 18-rand-77-sent teen die euro en 22-rand-67-sent teen die pond. Bitcoin verhandel teen 97-duisend-462-dollar-75-sent. Die prys van goud is twee-duisend-660-dollar-2-sent per fynons en die prys van Brent ruolie 71-dollar-93-sent per vat.

Bly ingeskakel vir meer nuus……………….