Nuus 06:00

BULLETIN 3 Desember 6 vm

Goeiemôre. Ek is……..

In die bulletin:

# Minister Lamola beklemtoon die belangrikheid van handelsbetrekkinge met Nigerië
# Solidariteit sal regstappe doen indien die regering die BELA-ooreenkoms verontagsaam
# En krieket: Die Proteas benodig nog drie toetsoorwinnings om die eindstryd van die Wêreld-toetskampioenskap te haal

# Die minister van Internasionale Betrekkinge en Samewerking, Ronald Lamola, het die belangrikheid van die uitbreiding van handelsbetrekkinge tussen Suid-Afrika en Nigerië en die benutting van geleenthede binne die Afrika Kontinentale Vryhandelsgebied beklemtoon. Die minister was gister saam met die Nigeriese minister van Buitelandse Sake, ambassadeur Bianca Odumegwu-Ojukwu, in Kaapstad medevoorsitter van die ministeriële vergadering van die Bi-Nasionale Kommissie. Lamola het kommer uitgespreek oor die toestand van vrede en veiligheid in sommige dele van Afrika en wêreldwyd:

# Die vakbond Solidariteit sê sy ooreenkoms met die regering oor die Wysigingswet op Basiese Onderwyswette staan vas, ondanks teenkanting. Volgens die vakbond stel die ooreenkoms wat tussen die Presidensie en die ministerie van Basiese Onderwys onderteken is, die instel van omstrede bepalings uit, tot die vereiste norme, standaarde en beleide gefinaliseer is. Dit kan tot 18 maande neem. Solidariteit se uitvoerende hoof, Dirk Hermann, waarsku regstappe sal volg indien die regering die ooreenkoms probeer omseil:

# Die Gautengse LUR vir Onderwys, Matome Chiloane, is hartseer oor die dood van twee leerders van die Laerskool Wilhelmina Hoskins in Riverlea. ‘n Seun in graad sewe is Saterdag by sy huis geskiet, en ‘n graad vier-seun is gister dood nadat hy koekies geëet het wat van ‘n plaaslike spaza-winkel gekom het. Die departement se woordvoerder, Steve Mabona sê nooddienste het probeer help, maar die kind is by die huis dood verklaar:

# Een-en-twintig onwettige mynwerkers het uit eie wil die Margaret-skag en skag tien in Stilfontein in Noordwes verlaat. Hulle is van Lesotho, Zimbabwe en Mosambiek. Dit volg nadat die Hooggeregshof in Pretoria die regering beveel het om gemeenskapslede en organisasies toe te laat om humanitêre hulp te verleen aan die ondergrondse mynwerkers. Meer as een-duisend-200 mynwerkers het sedert 18 Augustus toe Operasie Vala Umgodi begin is, verskillende skagte verlaat.

# Die voormalige onderwyser en joernalis, Willem Breytenbach, het in die Streekhof in Kaapstad op sewe aanklagte van onsedelike aanranding en drie van seksuele aanranding skuldig gepleit. Die aanklagte hou verband met insidente tussen 1997 en 2018, insluitende sy tyd as onderwyser en latere interaksie met kollegas. Breytenbach het deur sy regsverteenwoordiger om verskoning gevra en is skuldig bevind deur landdros Amori Graf. Slotbetoë vir vonnisoplegging begin binnekort.

# Krieket: Oorwinnings in hulle oorblywende drie toetse van die seisoen sal die Proteas laat deurdring na die eindstryd van die huidige Wêreldtoetskampioenskap. Suid-Afrika is tans tweede op die punteleer na Indië, nadat hulle Sri Lanka in Durban met 233 lopies verslaan het. Hulle sal vir die eindstryd kwalifiseer as hulle die tweede toets in Gqeberha wen, sowel as die volgende twee teen Pakistan – ongeag van ander uitslae. Indië, Australië, Nieu-Seeland, Sri Lanka, Engeland en Pakistan kan ook nog die titelstryd haal.

# En die finansiële aanwysers: Die rand verhandel teen 18-rand-13-sent teen die dollar, 19-rand-3-sent teen die euro en 22-rand-94-sent teen die pond. Bitcoin verhandel teen 95-duisend-585-dollar-23-sent. Die prys van goud is twee-duisend-638-dollar-75-sent per fynons en die prys van Brent ruolie 71-dollar-81-sent per vat.

Bly ingeskakel vir meer nuus……………….