Nuus 06:00

BULLETIN 29 November 6 vm

Goeiemôre. Ek is……..

In die bulletin:

# President Ramaphosa vra vir voortgesette ekonomiese transformasie om ongelykheid aan te spreek
# Die VF Plus verwelkom die deurbraak in die BELA-wet-dispuut
# En Australiese wetgewers aanvaar reëls om onder-16’s op sosialemedia-platforms te verbied

# President Cyril Ramaphosa vra vir voortgesette ekonomiese transformasie om ongelykheid aan te spreek. Hy het in die Nasionale Raad van Provinsies gewys op voortgesette pogings om die ekonomie te herbou en klein ondernemings te bemagtig wat noodsaaklik is om armoede te verminder en geleenthede vir alle Suid-Afrikaners te skep. Ramaphosa het die behoefte beklemtoon aan inklusiewe groei, grondhervorming, verbeterde toegang tot dienste en om diepgewortelde ongelykhede aan te spreek:

# Die Vryheidsfront Plus het die skikkingsooreenkoms verwelkom wat by die Nasionale Ekonomiese Ontwikkelings- en Arbeidsraad bereik is oor die Wysigingswet op Basiese Onderwyswette. Die minister van Basiese Onderwys, Siviwe Gwarube, en Solidariteit het ‘n bilaterale skikkingsooreenkoms onderteken wat bekommernisse oor artikels vier en vyf van die BELA-wet aanspreek. Die afdelings hou verband met toelatings en taalbeleide van individuele skole. Wynand Boshoff van die VF Plus sê die departement moet eers beleidsdokumente ontwikkel voordat enigiets ingestel kan word:

# Die DA sê die Stad Johannesburg se waterplan is onvoldoende en maak nie voorsiening vir onmiddellike verligting vir inwoners met watertekorte nie. Die party voer aan die stad se reaksie, wat eers in Februarie volgende jaar sal intree, is nie genoeg nie. Die DA-lid, Belinda Kayser-Echeozonjoku, sê die plan bied geen korttermynoplossings nie, dit versuim om ernstige lekkasies in 22 reservoirs reg te maak, en daar is ‘n gebrek aan ‘n duidelike strategie vir watertenkwaens in gebiede wat geraak word:

# Australiese parlementslede het waterskeiding-reëls deurgevoer om tieners jonger as 16 op sosiale media te verbied. Dit is een van die strengste optredes nog teen gewilde webwerwe, soos Facebook, Instagram en X. Die wetgewing, wat van sosiale media-maatskappye vereis om “redelike stappe” te doen om te verhoed dat jong tieners rekenings het, is in die Senaat aanvaar met 34 stemme teen 19. Die nuwe reëls sal nou na die laerhuis teruggaan, waar parlementslede reeds Woensdag die wetsontwerp gesteun het. Dit is basies ‘n uitgemaakte saak dat finale goedkeuring gegee sal word om dit wet te maak.

# Tennis: Die Franse Ope-kampioen, Iga Swiatek, is vir slegs ‘n maand geskors vir ‘n opkikker-oortreding nadat sy die Internasionale Tennis-integriteitsagentskap oorreed het dit was nie opsetlik nie. Die Poolse speler het in Augustus buite ‘n kompetisie positief getoets vir die verbode middel trimetazidine. Die agentskap het aanvaar die positiewe toets was te wyte aan besmetting.

# Die finansiële aanwysers: Die rand verhandel teen 18-rand-11-sent teen die dollar, 19-rand-12-sent teen die euro en 22-rand-99-sent teen die pond. Bitcoin verhandel teen 95-duisend-863-dollar-55-sent. Die prys van goud is twee-duisend-638-dollar-50-sent per fynons en die prys van Brent ruolie 73-dollar-9-sent per vat.

# En ten slotte: Die bekroonde Suid-Afrikaanse rolprentregisseur Ian Gabriel se politieke riller, Death of a Whistleblower is vandag die première by die 32ste African Diaspora International Film Festival in New York. Die rolprent met Rob van Vuuren en Noxolo Dlamini speel af teen die agtergrond van ‘n gevaarlike sameswering wat militêre korrupsie en onwettige wapenhandel insluit. Die film is deel van ‘n uiteenlopende program van 65 rolprente, insluitend 12 van Suid-Afrika, op die fees.

Bly ingeskakel vir meer nuus……………….