Nuus 06:00

BULLETIN 22 November 6 vm

Goeiemôre. Ek is……..

In die bulletin:

# Die Reserwebank verwag ‘n effense styging in inflasie vanaf 2025
# Die regering word beskuldig dat hy die Stilfontein-mynwerkers tot oorgawe dwing
# En rugby: Johan Ackermann keer terug na die Suid-Afrika ná sewe jaar in die buiteland

# Die Suid-Afrikaanse Reserwebank voorspel die inflasiekoers sal middel volgende jaar effens begin styg. Die koers het onlangs tot 2,8-persent gedaal, maar sal na verwagting laat volgende jaar effens verhoog tot 4,6-persent. Vorige vooruitskattings was 4,4-persent. President Lesetja Kganyago skryf dit hoofsaaklik toe aan verwagte hoër elektrisiteitspryse:

Die EFF het die Suid-Afrikaanse Reserwebank se besluit om die repokoers met 25 basispunte tot 7,75-persent te verlaag intussen ten sterkste veroordeel. Die EFF sê hierdie skugter stap weerspieël die bank se voortgesette versuim om in die belang van die burgers op te tree, deur die winsgewendheid van die finansiële sektor bo die dringende behoefte aan ekonomiese groei en werkskepping te stel. Die party eis ’n omvattende hersiening van die land se monetêre beleid.

# Die nie-regeringsorganisasie Society for the Protection of Our Constitution het die regering beskuldig dat hy probeer om die onwettige ondergrondse mynwerkers in Stilfontein tot oorgawe te dwing of ‘n onafwendbare dood in die gesig te staar. Die Hooggeregshof in Pretoria het die organisasie se aansoek aangehoor wat ‘n dringende interdik vra om te verhoed dat die polisie kos, water en mediese behandeling van die onwettige mynwerkers weerhou. Uitspraak is voorbehou. Die organisasie se regsverteenwoordiger, Yasmin Omar, sê die regering verskuif sy verantwoordelikheid om die onwettige mynwerkers te red:

# Die vrou van Louis Liebenberg, wat beskuldig word van ‘n bedrogspul met diamantbeleggings, is borgtog geweier in die Landdroshof in Bronkhorstspruit. Louis en Desiree Liebenberg, asook ses ander, staan ​​tereg op aanklagte van bedrog, rampokkery, geldwassery en korrupsie vir bedrog van bykans 4,5-miljard-rand. Die Nasionale Vervolgingsgesag se streekswoordvoerder, Lumka Mahanjana, sê Louis Liebenberg se borgtogaansoek sal Maandag aangehoor word:

# Die Suid-Afrikaanse Sionistefederasie veroordeel die  Internasionale Strafhof se lasbriewe vir die Israelse premier, Benjamin Netanyahu en voormalige minister van Verdediging, Yoav Gallant. Die Federasie sê die lasbriewe is ongegrond, gebrekkig, polities gemotiveerd, en ‘n ondermyning van internasionale reg. Woordvoerder, Rolene Marks, sê die Hof skep ‘n gevaarlike presedent, Israel se selfverdediging word verkeerdelik gelykgestel aan terrorisme, en dis ‘n onregverdige aanval op Israel se reg tot selfverdediging. Die Federasie sê dis lagwekkend dat daar ook ‘n lasbrief uitgereik is vir Hamas se Mohammed Deif wat reeds dood is en nie vir sy misdade verantwoording kan doen nie.

# Rugby: Die gewese Springbok en gerespekteerde afrigter, Johan Ackermann, is aangewys as nuwe afrigterskonsultant vir die Junior Springbokke. Die 54-jarige Ackermann keer terug na Suid-Afrika na sewe jaar oorsee, waar hy Gloucester in Engeland en twee Japanese spanne afgerig het. Hy het die land in 2018 verlaat nadat hy die Leeus drie jaar na mekaar tot in die eindstryd van Super Rugby gelei het. Ackermann was voorheen ook afrigter van die Suid-Afrikaanse A-span. SA Rugby beskryf sy terugkeer as fantasties vir Suid-Afrikaanse rugby, en glo het sal ‘n wonderlike mentor wees.

# En die finansiële aanwysers: Die rand verhandel teen 18-rand-9-sent  teen die dollar, 18-rand-94-sent teen die euro en 22-rand-78-sent teen die pond. Bitcoin verhandel teen 98-duisend-482-dollar-80-sent. Die prys van goud is twee-duisend-669-dollar-21-sent per fynons en die prys van Brent ruolie 74-dollar-31-sent per vat.

Bly ingeskakel vir meer nuus……………….