Nuus 06:00

BULLETIN 18 November 6 vm

Goeiemôre. Ek is……..

In die bulletin:

# Aartsbiskop Thabo Makgoba ondersoek moontlike seksuele teistering in die Anglikaanse Kerk
# Eskom sê hy is op koers om in die elektrisiteitsvraag te voorsien
# En die Hizbollah-woordvoerder is dood in ‘n Israelse aanval

# Aartsbiskop Thabo Makgoba het ‘n ondersoek van stapel gestuur om te verseker die Anglikaanse Kerk in Kaapstad het sy verpligting nagekom om sy lidmate teen teistering te beskerm. ‘n Onafhanklike Makin-oorsig het bevind die voormalige Britse prokureur, John Smyth, was verantwoordelik vir die seksuele teistering van meer as 100 seuns en mans in Brittanje, Zimbabwe en Suid-Afrika. Smyth het in die 70’s en 80’s evangeliese somerkampe aangebied. Hy het twee keer ‘n Anglikaanse Kerk in Kaapstad besoek. Makgoba sê geen bewyse is ooit by die kerk ingedien dat Smyth oortredings in Kaapstad gepleeg het nie.

# Eskom sê met ‘n beskikbare opwekkingsvermoë van 29-duisend-157-megawatt en piektydaanvraag wat volgens voorspellings 25-duisend-954-megawatt sal wees, bly hy op koers om te voldoen aan die vraag na elektrisiteit. Daphne Mokwena van Eskom sê teen Maandagaand sal ‘n bykomende twee-duisend-540-megawatt ook beskikbaar wees. Sy sê Eskom se vroeëre vooruitskatting het ‘n waarskynlike scenario van ‘n somer sonder beurtkrag geskets danksy strukturele opwekkingsverbeterings:

# ActionSA in Gauteng se Jeugforum eis dat president Cyril Ramaphosa beslissend optree om die spazawinkelkrisis die hoof te bied. Mologadi Modiba van die forum sê in plaas van leë beloftes, moet hy ‘n ramptoestand afkondig en konkrete stappe doen om kinders en die plaaslike ekonomie te beskerm. Sy sê toe hy die land toegespreek het, het Ramaphosa buitelandse burgers vrygespreek van enige verantwoordelikheid na die dood van meer as 20 kinders, onder wie die ses Soweto-slagoffers wie se lewens kortgeknip is:

# Die Maersk-filiaal, APM Terminals, hou vol sy hofuitdaging teen Transnet se Durbanse Hawekontrak is “te goeder trou” gebring. Hulle voer aan Transnet het nie aan sy eie tenderkriteria voldoen nie, insluitend ‘n solvensiemaatstaf. Volgens News24 is die kontrak van 32-miljard-rand aan die Filippynse maatskappy, ICTSI, toegeken, wat APM daarvan beskuldig het dat hy ten gunste is van markoorheersing. Volgens APM moet die proses deursigtig wees tot voordeel van Suid-Afrika. ’n Geregtelike hersiening is vir Maart 2025 vasgestel.

# Die Libanese militante groep Hizbollah se woordvoerder, Mohammed Afif, is na bewering dood en drie ander beseer tydens ‘n Israelse lugaanval in Beiroet. Dit was die vierde Israelse aanval in die stad sedert 2006 toe ‘n 34 dae lange gewapende konflik tussen Israel en Hizbollah uitgebreek het. Afif was die gesig van Hizbollah in verskeie mediakonferensies ná die sluipmoord op die leier Hassan Nasrallah in September vanjaar. Israel se oënskynlike fokus op Afif kom te midde van ‘n verskerping van sy aanval in Libanon.

# Gholf: Die viermalige Major-wenner, Rory McIlroy het die einde van die seisoen se DP World-toer die derde keer gewen. Die Ier het met twee houe voor Denemarke se Rasmus Hojgaard op 15 onder geëindig ná ‘n drie-onder-baansyfer-69 in sy laaste ronde. Die oorwinning bevestig ook die 35-jarige vir die sesde keer in die derde agtereenvolgende seisoen as die Race to Dubai-kampioen. Hy ewenaar die Spanjaard Seve Ballesteros se rekord. McIlroy sê dit is ‘n gepaste einde vir die jaar:

# En die finansiële aanwysers: Die rand verhandel teen 18-rand-22-sent  teen die dollar, 19-rand-20-sent teen die euro en 22-rand-99-sent teen die pond. Bitcoin verhandel teen 89-duisend-805-dollar-63-sent. Die prys van goud is twee-duisend-573-dollar-27-sent per fynons en die prys van Brent ruolie 70-dollar-91-sent per vat.

Bly ingeskakel vir meer nuus……………….