News 08:00

BULLETIN 7 Desember 8 vm

Goeiemôre. Ek is……..

In die bulletin:

# Die ANC bevestig ‘n proses is in plek rakende die Simelane-ondersoek
# Die DA eis dringende optrede nadat die Ouditeur-generaal onreëlmatige NSFAS uitgawes van 60-miljard-rand uitwys
# En, krieket: Die Proteas en Engeland se vroue speel in ‘n Swartdag-eendagwedstryd in Durban

# Die sekretaris-generaal van die ANC, Fikile Mbalula, het bevestig daar is deurlopende ondersoeke na die lening van 575-duisend-600-rand by die VBS Mutual Bank deur die minister van Menslike Nedersettings, Thembi Simelane. Mbalula het aan die media gesê Simelane is nie aangekla nie en sy hoef dus nie opsy te staan nie. Volgens Mbalula volg hulle partyprosesse en president Cyril Ramaphosa sal die finale besluit neem:

# Die DA doen ‘n beroep op die minister van Hoër Onderwys, Nobuhle Nkabane, om rekenskap te gee oor die bykans 60-miljard-rand in onreëlmatige besteding wat uitgewys is in die Nasionale Finansiële Hulpskema vir Studente se 2022/2023 jaarverslag wat laat ingedien is. Die party eis duidelikheid oor hoe die skema beplan om finansiële teenstrydighede aan te spreek, interne beheermaatreëls te verbeter en beter toesig te verseker. Die DA-lid, Matlhodi Maseko, vra die regering om hierdie kwessies voor die volgende akademiese jaar op te los om voortgesette  wanbestuur te voorkom:

# Die Nelson Mandela-stigting het ‘n mosie by die Wes-Kaapse Hooggeregshof ingedien waarin die regering versoek word om op te tree oor grondhervorming. Die mosie beskuldig die regering dat hy nie Artikel 25-vyf van die Grondwet, wat voorsiening maak vir billike toegang tot grond, ten volle implementeer nie. Die stigting eis duideliker definisies van billike toegang, die identifisering van begunstigdes en gereelde bywerking oor vordering om Suid-Afrika se nalatenskap van grondonteiening aan te spreek.

# Roemenië se Konstitusionele Hof het die uitslag van die eerste ronde van die presidentsverkiesing twee weke gelede nietig verklaar. Die proses begin nou van vooraf en ‘n nuwe datum sal bepaal word. Calin Georgescu het die eerste ronde gewen. Die feitlik onbekende verregse Navo-skeptikus het voorheen steun uitgespreek vir die Russiese president, Vladimir Putin. Die hof sê die beslissing is gedoen om die korrektheid en wettigheid van die verkiesingsproses te verseker nadat gedeklassifiseerde inteliggensiedokumente besonderhede gegee het van Russiese invloed op sosiale media.

# En, krieket: Suid-Afrika en Engeland se vroue pak mekaar môre in die tweede eendagwedstryd op Kingsmead in Durban, wat nog ‘n Swartdag-geleentheid sal wees. Krieket Suid-Afrika het die dag bekendgestel om bewustheid te kweek oor geslagsgeweld, en die opbrengs gaan aan ‘n veilige huis vir vroue in nood. Die Proteas het teruggeslaan nadat hulle in die drie T20s ore aangesit is, en het die eerste eendagkragmeting in Kimberley met ses paaltjies gewen met 70 balle oor. Die laaste wedstryd word Woensdag in Potchefstroom gespeel.

Bly ingeskakel vir meer nuus……………….