Goeie Nuus

BULLETIN NUUSAGENTSKAP 1 Julie

Goeiemiddag. Hier is jou Goeie Nuus:

# Die musikant Tyla maak Suid-Afrika steeds trots op die wêreldverhoog nadat sy twee Billboard-toekennings in Los Angeles opgeraap het. Sy het weggestap met die toekennings vir beste nuwe kunstenaar en beste internasionale kunstenaar. Sy is slegs die derde wenner van die kategorie vir beste nuwe kunstenaar wat nie in Amerika gebore is nie. Nog ‘n Suid-Afrikaner, Makhadzi, het die kykerskeuse vir beste internasionale vertoning gewen. Tyla het in haar aanvaardingstoespraak hulde gebring aan die Afrika-sterre wat die weg vir haar gebaan het:

# Suid-Afrika se grootste middestad-kunsuitstalling wat net een aand duur, is terug om kinderwelsynsorganisasies te ondersteun deur ‘n duisend A5-tekeninge te skep. Die kunswerke wat orals in Victoria Yards, Lorentzville, in Johannesburg hang, word uitgestal en teen honderd-rand elk verkoop in die wêreld se grootste A5-kunsuitstalling. Suid-Afrikaners uit alle sektore van die gemeenskap skep die kunswerke. Dit sluit skoolkinders, dakloses, weeskinders, ontwerpers en kunstenaars, studente en beroepslui in.

# Die Fondsinsamelingsforum vir Kore vir Bejaardes in die Groter Ekurhuleni het kore uit ‘n wye gebied, insluitend Dawnpark en Vosloorus, verenig vir finansiële ondersteuning. Die forum het ondanks ‘n onderbreking weens die Covid-19-pandemie in 2022 herleef met ‘n nuutgevonde doelwit. Die geld wat sover met kaartjieverkope uit optredes ingesamel is, word vir aktiwiteite en etes vir lede aangewend. Die forum bestaan tans uit tien organisasies en wil bejaardes in die gemeenskappe help om finansieel onafhanklik te word.

# Die Stad Kaapstad sê sy Uitgebreide Openbarewerkeprogram se Entrepreneursopleidingsprogram help steeds klein ondernemings. Die eienaar van die tuis-spysenieringssonderneming Gourmet to Go in Parow, Peter Gie, is een van die program se suksesverhale. Die burgemeesterskomiteelid vir Stedelike Afvalbestuur, Grant Twigg, sê die uitwerking van die program die afgelope twee jaar was beduidend en het onder meer werkskepping en ekonomiese groei onder deelnemende ondernemings aangemoedig:

# En ten slotte: ‘n Student aan die Universiteit van die Wes-Kaap, Asenathi Mjacu, moedig ander studente aan om los werk te kry of klein ondernemings te begin om hulle inkomste aan te vul. Die derdejaar-student het tydens haar oorbruggingsjaar in 2020 haar eie klerereeks begin. Sy het naaldwerk en ontwerp bemeester en staatgemaak op haar vasberadenheid en aanlyn bronne soos YouTube and Tiktok-leervideo’s. Die 23-jarige het haar eerste naaldwerkmasjien gekoop met ‘n koopbewys van ‘n duisend-rand wat die Mosselbaaise burgemeester, Dirk Kotzé, aan haar toegeken het vir haar matriekprestasie.

Bly ingeskakel vir meer nuus……………….