Goeie Nuus

BULLETIN 22 September 2 nm

Goeiemiddag, hier is jou Goeie Nuus:

# Die 7de jaarlikse Tshwane Varsity-hackathon begin vandag in die veeldoelige saal van die Tshwane Universiteit vir Tegnologie se Ga-Rankuwa-kampus. Die geleentheid sal van die slimste en mees kreatiewe rekenaar-slimkoppe van regoor die metro byeenbring vir ‘n intensiewe kompetisie van 48-uur wat op innovasie en probleemoplossing sal fokus. Altesaam 150 studente van TUT, Tuks, Unisa en die Sefako Makgatho-universiteit vir Gesondheidswetenskappe sal daaraan deelneem. Die burgemeester van Tshwane, Nasiphi Moya, sê die hackathon is ‘n fantastiese geleentheid vir studente:

# Die DA in die Wes-Kaap verwelkom CapeNature se 11de jaarlikse Toegangsweek wat tot Vrydag duur en waar mense gratis toegang kry tot sekere reservate in die provinsie. CapeNature-reservate wat aan Toegangsweek deelneem, sluit in Bird Island, Hottentots-Holland, Outeniqua en Assegaaibosch. ‘n DA-woordvoerder, Dave Bryant, sê buiten die skouspelagtige natuurtonele, beskerm hierdie reservate sommige van Suid-Afrika se mees bedreigde spesies en kwesbare ekostelsels:

# Swem: Span Suid-Afrika se Paralimpiese swemmer, Christian Sadie, het silwer gebuit in die mans se S13-200-meter individuele wisselslag op die eerste dag van die Wêreld Para-swemkampioenskap in Singapoer. Die 27-jarige Sadie het die Afrika-rekord in die eindpoging tot twee-minute-04,03-sekondes verbeter. Inaki Basiloff van Argentinië het goud opgeraap en Aleksei Ganiuk, ŉ neutrale Paralimpiese atleet, het brons gewen. Nog ŉ Suid-Afrikaner, Nathan Hendricks, was sewende in die mans S13-100-meter vlinderslag. Hy het egter in die uitdunne ŉ Afrika-rekord van 58,46-sekondes opgestel.

# Atletiek: Suid-Afrika het ‘n bronsmedalje in die mans 4×400-meter-aflos op die laaste dag van die Wêreldatletiekkampioenskap in Tokio verower. Botswana het goud gewen en die eerste Afrika-wenners van die byeenkoms geword. Span SA met Lythe Pillay, Udeme Okon, Wayde van Niekerk en Zakithi Nene het ná die VSA klaargemaak. Intussen het die Amerikaner, Melissa Jefferson-Wooden, slegs die tweede vroulike naelloper na Shelly-Ann Fraser-Pryce geword om die naelloop-driekuns te voltooi. Sy het die 100- en 200-meter gewen, en sy was deel van die seëvierende vroue 4×100-meter-span.

# En ten slotte: Die Japanese fliek, Demon Slayer: Kimetsu no Yaiba Infinity Castle, is steeds nommer een by Noord-Amerikaanse kaartjiekantore. Die film is die eerste van ŉ trilogie oor ŉ seun wat demone jag om sy gesin te wreek en ŉ oplossing te vind vir sy suster wat in ŉ demoon verander het. Him, van Universal and Peele se Monkeypaw, is tweede en New Line se The Conjuring: The Last Rites is derde. Lionsgate se The Long Walk en Focus se Downton Abbey: The Finale voltooi die topvyf.

Bly ingeskakel vir meer nuus……………….