Goeie Nuus

BULLETIN 9 Julie 2 nm

Goeiemiddag, hier is jou Goeie Nuus:

# Mej Suid-Afrika, Mia le Roux, het haar verlowing aan haar langtermyn-kêrel, Luke ten Oever, aangekondig. Hulle het die nuus aanlyn gedeel en haar ring, met ‘n smaraggroen steen, gewys. Die paartjie sê hulle het gekies om hul verlowing privaat te geniet voor hulle dit bekend maak. Ten Oever het haar in ‘n rustige natuurlike omgewing gevra om te trou, . Le Roux word nou nog een van ‘n groeiende lys Mej SA-wenners wat kort ná hul jaar in die kollig die knoop deurhaak.

Die voormalige Mej Suid-Afrika en Mej Heelal, Demi-Leigh Tebow, en haar man, die Amerikaanse voetbalster Tim Tebow, het intussen hul eersteling verwelkom. Hulle dogtertjie heet Daphne Reign. Demi-Leigh sê die naam is ter ere van ‘n geliefde familiematriarg en weerspieël haar Christelike geloof. Sy verduidelik die naam Daphne is geïnspireer deur haar tante en Reign is ‘n geestelike simbool. Die paartjie sê hul dogter is gebedsverhoring en geskep om met ‘n doel, in liefde en identiteit te heers.

# Suid-Afrika se senior straatdansgroep het goud verower in die straatdanskategorie op die 2025 Wêreldbeker vir Dans in Burgos, Spanje. Die span het ‘n finale telling van 95,7-persent behaal vir hulle uitspattige, energieke en kragtige vertoning, wat ‘n samevoeging van hip-hop, pantsula, en amapiano is. Die kompetisie wat dikwels beskryf word as die ‘Olimpiese Spele van Dans’ het inskrywings van meer as 50 lande ontvang. Suid-Afrika het ook die beste gevaar in die Junior- en Senior-kommersiële Hip-Hop-kategorie. Die kompetisie eindig Saterdag.

# Die Thonga Beach Lodge in die iSimangaliso-vleilandpark in KwaZulu-Natal is die tweede agtereenvolgende jaar aangewys as Suid-Afrika se voorste strandhotel deur die 2025 Wêreld-reistoekennings. Die lodge, wat gevier word vir sy kombinering van luuksheid met volhoubaarheid, ondersteun mariene-bewaring, skilpad-monitering en plaaslike gemeenskapsontwikkeling deur die Isibindi-stigting. Die oord word geloof vir sy omgewingsbewuste benadering, insluitend plastiekvrye bedrywighede en rifopvoeding, wat hom ‘n leier in doelgedrewe toerisme maak. Die toekenning beklemtoon Suid-Afrika se toenemende reputasie vir bewaringsgeleide gasvryheid op die wêreldverhoog.

# En ten slotte: Die speelgoedvervaardiger Mattel het sy eerste Barbie-pop met tipe 1-diabetes bekendgestel om insluiting en empatie onder kinders te bevorder. Die nuwe pop dra ‘n klein toestel wat haar bloedsuiker voortdurend meet. Sy het ʼn foon met ʼn toepassing wat haar help om haar bloedsuikervlakke te monitor en ʼn klein, draagbare insulienpomp wat outomaties ʼn dosis toedien indien nodig. Die pop dra ʼn blou kolletjieshempie met ‘n bypassende romp wat deur wêreldwye diabetesbewustheid-simbole geïnspireer is.

Bly ingeskakel vir meer nuus……………….