Goeie Nuus

BULLETIN NUUSAGENTSKAP 11 Desember

Goeiemiddag. Hier is jou Goeie Nuus:

# Percy Mashange het die eerste student in beeldende kunste aan die Universiteit Stellenbosch geword wie se meestersgraad tot ‘n doktorsgraad aangepas is. Die universiteit sê Mashange se treffende abstrakte juweel-ontwerpe en baanbrekende navorsing daag tradisies uit en moedig gesprekke aan oor identiteit en verteenwoordiging. Hy sê in Afrika-kultuur is juweliersware nie net ʼn bykomstigheid nie, maar ʼn belangrike uitdrukking van identiteit, erfenis, tradisie en sosiale status, en vermeng tradisie en nuwerwetsheid:

# Byna 100 minderbevoorregte kinders van George het die kans van ‘n leeftyd gekry met die 13de jaarlikse Santa-vlug. Die geleentheid is georganiseer deur die Vlugopleidingskool en gesteun deur plaaslike vrywillgers. Dit het die kinders die geleentheid gegee om die wêreld van bo-af te sien. Hulle kon op die plaaslike lughawe ook deelneem aan bedrywighede soos springkastele en het eetgoed gekry terwyl hulle gretig gewag het op hulle kans om te vlieg. Boonop het Kersvader per vliegtuig aangekom en die kinders bederf met geskenke en heelwat feesvreugde.

# Die Noordwes-universiteit sê die grensverskuiwende veldtog, Tswala!, maak aansienlike vordering. Die Tswana-woord beteken “maak toe”. Die projek wil die gaping tussen studente, onderwysers en die wêreld oorbrug deur digitale instrumente in klaskamers bekend te stel. Professor Jaco Hoffman sê hierdie projek is ʼn belangrike stap sodat alle studente, ongeag plek of agtergrond, toegang kry tot die digitale gereedskap wat nodig is om in die moderne wêreld sukses te behaal:

# Die getal luiperds het verdriedubbel in die wêreld se grootste bewaringsgebied, die Kafue-nasionale park in Zambië. Die park spog tans met 4,4 luiperds per 100 vierkante kilometer. Die park maak gebruik van kameras om die diergetalle te monitor, asook slimmer teen-stropingspatrollies en GPS-toestelle op witrugaasvoëls om op te tree as ‘n vroeë waarskuwingstelsel vir potensiële stropery. Hierdie stappe het ook gelei tot ‘n ommekeer in die afname van die leeubevolking. Luiperds word gelys as kwesbaar op die Internasionale Unie vir Natuurbewaring se rooilys van bedreigde spesies.

# En ten slotte: Pamela Anderson se bekende rooi swembroek in Baywatch gaan in Londen uitgestal word. Die 57-jarige Kanadees was die menseredder CJ Parker in die gewilde TV-reeks van die 1990’s. Die eenstuk is waarskynlik die wêreld se bekendste swembroek, met nagemaakte weergawes met die Baywatch-logo algemeen aanlyn beskikbaar. Dit sal te sien wees op Design Museum se uitstalling, Splash! A Century of Swimming and Style, wat in Maart open. Anderson is dié week die heel eerste keer vir ‘n Golden Globe benoem vir haar rol in The Last Showgirl.

Bly ingeskakel vir meer nuus……………….