Goeie Nuus

BULLETIN NUUSAGENTSKAP 10 Desember

Goeiemiddag. Hier is jou Goeie Nuus:

# Die Suid-Afrikaanse operasangeres, Pretty Yende, sê haar optrede met die heropening van die Notre Dame-katedraal in Parys was ‘n heilige oomblik. Sy het Amazing Grace gesing saam met ŉ orkes onder leiding van die Venezolaanse dirigent, Gustavo Dudamel. Die konsert het gevolg vyf jaar nadat die majestueuse katedraal in April 2019 in ŉ brand verwoes is. Yende het aan die SABC gesê sy was destyds in die Franse hoofstad toe die brand ontstaan het:

# Emilia Pérez van Netflix het tien benoemings ontvang vir 2025 se Golden Globe-toekennings. Jacques Audiard se Drug Cartel-musiekblyspel het die meeste benoemings ontvang, onder meer vir Beste Rolprent, Oorspronklike Partituur en vir Zoe Saldana en Selena Gomez as Beste Byspeler. A24 se The Brutalist het sewe benoemings, insluitend Beste Rolprent – Drama en Beste Akteur vir Adrien Brody. Conclave het ses benoemings ontvang en Anora en The Substance vyf elk. Wicked, A Real Pain, Challengers, en The Wild Robot het elk vier ontvang.

# Die Universiteit van Pretoria sê hy het weereens baie goed gevaar op verskeie wêreldwye metings in 2024. Die instelling se Rekenkundige en Finansiële-navorsingsafdeling het die eerste plek behaal op die Quacquarelli Symonds Rankings H-aanwyser. Drie van die universiteit se vakdissiplines is deur die 2024 QS Wêreld-universiteitsranglys onder die top 100 gelys. Die universiteit sê die ranglys benadruk sy vordering met die bereiking van sy visie om ‘n vooraanstaande navorsingsintensiewe instelling te word wat internasionaal erken word vir sy gehalte, relevansie en uitwerking.

# Die Voiceout-landbougemeenskap vir dowes in Westonaria naby Johannesburg het ‘n program van stapel gestuur wat dowe mense ‘n geleentheid bied om landbouvaardighede te ontwikkel en werk te kry. Die projek is bedoel om dowe mense in staat te stel om deur gebaretaal in die werkplek te kommunikeer. Die werkers van die Westonaria-landboupark naby Bekkersdal is verantwoordelik vir die kweek van varsprodukte wat aan plaaslike winkels gelewer word. Die stigter, Matebogo Victoria, glo boerdery is ‘n noodsaaklike bron van werk vir mense met gestremdhede.

# En ten slotte: Mohammad en Olivia was die gewildste name wat Engelse en Walliese ouers hulle babas verlede jaar gegee het. Mohammad het Noah onttroon, wat in 2022 nommer een was, en Olivia het haar eerste plek behou. Brittanje se Kantoor vir Nasionale Statistiek sê ‘n geraamde vier-duisend-661 seuntjies is in 2023 Mohammad gedoop, gevolg deur Noah, Oliver, George, Leo, Arthur, Luca, Theodore, Oscar en Henry. Amelia was die tweede gewildste meisienaam, gevolg deur Isla, Lily, Freya, Ava, Ivy, Florence, Willow en Isabella.

Bly ingeskakel vir meer nuus……………….