Goeie Nuus

BULLETIN NUUSAGENTSKAP 2 Desember

Goeiemiddag. Hier is jou Goeie Nuus:

# Die Suid-Afrikaanse Nasionale Bioverskeidenheidsinstituut werk saam met die kunstenaar en beeldhouer, Anton Smit, om 15 van sy beeldhouwerke by die Pretoriase nasionale totaniese tuine uit te stal. Smit is veral bekend vir sy enorme brons beelde wat temas soos lyding, versoening, glorie en vergeesteliking uitbeeld. SANBI se woordvoerder, Nontsikelelo Mpulo, sê besoekers kan hulle nou verlustig aan Smit se voortreflike kunswerke in die tuin wat ‘n groen lafenis is vir inwoners van Pretoria se oostelike woonbuurte.

# Die pasgekroonde 2024 Mej Soweto, Mbali Khumalo, sê sy gaan haar tydens haar bewind beywer vir kwessies oor geestesgesondheid. Die 20-jarige Sielkunde- en Portugese student aan die Universiteit van die Witwatersrand is Saterdagaand in die Soweto-teater in Jabulani gekroon. Khumalo het haar stryd met depressie en angs gedeel en sê dis belangrik dat mense bewus gemaak word van geestesgesondheid. Onthatile Mohuba en Boitumelo Molotsane was die naaswenners.

# Die burgemeester van Ekurhuleni, Nkosindiphile Xhakaza, het die metro se beursfonds ‘n hupstoot van meer as agt-miljoen-rand gegee. Die bedrag is ingesamel op ‘n burgemeestersgholfdag, waarop Xhakaza persoonlik 50-duisend-rand beloof het. Die fonds sal in 2025 100 studente help, veral dié wat loopbane wil volg in wetenskap, tegnologie, ingenieurswese en lugvaart. Matrieks wat in aanmerking kom moet teen 20 Desember aansoek doen vir die beurse op Ekurhuleni se werwingsblad.

# Disney Entertainment se medevoorsitter, Alan Bergman, sê Moana 2 het alle verwagtinge oortref en getuig van die verskynsel wat Moana geword het. Die tekenfliek met Auli’i Cravalho en Dwayne Johnson in die hoofrolle het die beste vyfdag-debuut ooit gemaak en Universal se 2023-treffer, The Super Mario Bros, verbygesteek. Moana 2 se wêreldbekendstelling is ook die tweede grootste van die jaar naas nog ʼn Disney-fliek, Deadpool & Wolverine. Universal se Wicked en Paramount se Gladiator 2 wat albei verlede naweek bekendstel is, lok steeds fliekgehore.

# En ten slotte: Londen, bekend vir sy wêreldberoemde museums en naglewe, is die tiende agtereenvolgende jaar bekroon as die beste stad ter wêreld. Die Wêreld se Beste Stede-verslag vir 2025 het ‘n peiling gedoen onder meer as 22-persent van mense in 30 lande om die 270 grootste wêreldstede op ‘n ranglys te plaas. Volgens die verslag maak Londen se veerkragtige gees en globale aantreklikheid hom steeds ‘n aanloklike stad. New York is tweede op die lys, gevolg deur Parys, Tokio, en Singapoer. Kaapstad is 85ste.

Bly ingeskakel vir meer nuus……………….