Goeie Nuus

BULLETIN NUUSAGENTSKAP 28 November

Goeiemiddag. Hier is jou Goeie Nuus:

# Die Universiteit van die Vrystaat gaan volgende maand ere-doktorsgrade toeken aan twee vooraanstaande persone, Benita Diop en professor Murray Leibbrandt. Diop is die spesiale gesant van die voorsitter van die Afrika-unie se Kommissie oor Vroue, Vrede en Sekerheid en het haar lewe toegewy aan die bevordering van vroueleierskap in vredesonderhandelings en konflikoplossing. Sy sal ‘n ere-doktorsgraad in Afrikastudies ontvang. Leibbrandt, wat die Universiteit van Kaapstad se leerstoel vir Armoede en Ongelykheidsnavorsing beklee, gaan ‘n ere-doktorsgraad in Ekonomie en Bestuurswetenskappe ontvang.

# Die burgemeester van Ekurhuleni, Nkosindiphile Xhakaza, gaan vandag tydens die raadsitting die merkwaardige prestasies van drie vooraanstaande persone formeel erken. Hulle is die Olimpiese gouemedaljewenner Bayanda Walaza, en Mpumelelo Tshabalala, wat vanjaar as wenner van die IBO Wêreldkampioenskap gekroon is. Die derde persoon is die hoofondersoekbeampte in die saak van ‘n voormalige polisievrou wat haar familielede vermoor het om begrafnispolisse te eis, sersant Keshi Mabunda. Die burgemeester se kantoor sê die drie vereerdes is ‘n toonbeeld van uitmuntende bydraes tot die gemeenskap.

# Twee Wes-Kaapse leerders is gekies om Suid-Afirka op vanjaar se Izmir Internasionale Vernuwings-, Wetenskaps-, Energie- en Ingenieurstentoonstelling in Turkye te verteenwoordig. Thiedu du Preez gaan sy projek bekendstel wat kyk na die gebruik van natuurlike produkte om wonde te seël en beskerming teen besmettings te bied. Aadil Dawood se projek ontleed die uitwerking van oefening op die menslike liggaam op molekulêre vlak. Die LUR vir Onderwys, David Maynier, sê die leerders sal die geleentheid as ‘n waardevolle en vervullende ondervinding ervaar:

# Breadline Africa se jaarlikse Funky Sokkies-dag het byna 1,5-miljoen-rand ingesamel – ‘n halfmiljoen-rand meer as verlede jaar. Die veldtog verenig mense van alle agtergronde om sentrums vir vroeëkinderjare-ontwikkeling in kwesbare gemeenskappe te ondersteun. Die fondse sal 50 van hierdie sentrums in Suid-Afrika en Namibië voorsien van noodsaaklike artikels en hulpbronne vir klaskamers. Die opvoedkundige hulpbronne sluit legkaarte, bedrywigheidsboeke, speelklei, skryfbehoeftes, boeke, stoele en tafels in. Breadline Africa se uitvoerende hoof, Marion Wagner, sê belegging in vroeëkinderjare-ontwikkeling is belangrik om ʼn beter toekoms vir kinders te bou.

# En ten slotte: Paramount se Sonic the Hedgehog 3 sal na raming ‘n miljard-rand verdien oor die naweek van 20 tot 22 Desember wanneer dit vrygestel word, vergeleke met 910-miljoen-rand vir Mufasa: The Lion King. Dit is volgens data van die National Research Group. Die eerste Sonic The Hedgehog-rolprent het met sy opening in Februarie 2020 net meer as ‘n miljard-rand verdien.

Bly ingeskakel vir meer nuus……………….