Goeie Nuus

BULLETIN NUUSAGENTSKAP 22 November

Goeiemiddag. Hier is jou Goeie Nuus:

# Die Amy-stigting hou môreaand sy jaarlikse galadinee en veiling in die Century City-konferensiesentrum in Kaapstad. Die legendariese musikant, Yvonne Chaka Chaka, sal met die stigting se Ubuntu-toekenning bekroon word, uit erkenning van haar buitengewone bydraes tot maatskaplike opheffing en haar beliggaming van deernis en gemeenskapsgees. Die stigting beoog vanjaar om ‘n miljoen-rand deur die veiling in te samel. Die stigting betrek jaarliks ​​meer as tweeduisend begunstigdes deur sy vernuwende Naskoolse- en Jeugvaardigheidsontwikkelingsprogramme.

# Die Kaapse perdewedren-somerfees skop môre af by die Kenilworth-renbaan in Kaapstad. Die gesinsvriendelike geleentheid sluit in die gesogte Gr2 Cape Punters Cup-wedren, musiek, fynproewerskosstalletjies, ‘n kindersone en ‘n mark langs die baan met ‘n verskeidenheid klere, handgemaakte goedere en unieke geskenke. Die organiseerders sê wedren-geesdriftiges sal bederf word met opwindende aksie terwyl hulle die spoed en vaardigheid van perde dophou wat aan die wedren deelneem.

# Die Stad Kaapstad se Direktoraat Veiligheid en Sekerheid gaan môre duisende vrywilligers vereer tydens sy jaarlikse Buurtwag-toekennings. Individuele lede en organisasies word hiermee in verskeie kategorieë erken. Dit sluit in die Buurtwaglid van die Jaar, Misdaadbestryder van die Jaar en die Toekenning vir Maatskaplike Verantwoordelikheid. Die burgemeesterskomiteelid vir Veiligheid en Sekerheid, JP Smith, sê vier toekennings word aan groepe gegee en ses aan individue:

# Doppio Zero se jaarlikse Wish Tree-veldtog is gereed om deernis te versprei in die feesgety. Klante, personeel en gemeenskappe kom saam om goedere vir liefdadigheid te skenk. Vanjaar fokus die skenkings op skoolvoorrade vir die Learning Trust wat kinders se opvoeding in die land ondersteun. Die organisasie sê die bydraes help kinders met toerusting wat hulle nodig het om sukses te behaal. Vorige Wish Tree-veldtogte het gehelp met die bou van toilette vir voorskoolse kinders, om te verseker behoeftige ma’s en babas kry ‘n helpende hand tydens die feesgety.

# En ten slotte: Die Via Monte Napoleone in Milaan is nou die wêreld se duurste straat vir inkopies en het daarmee die eerste straat in Europa geword wat bo-aan dié lys verskyn. Die prestasie is volgens die jongste verslag deur die eiendomsgroep Cushman and Wakefield wat die afgelope 34 jaar die huurgeld van 138 van die voorste inkopiebestemmings volg. Huur in die Via Monte Napoleone het die afgelope 12 maande met 11-persent gestyg. Fifth Avenue in New York het intussen tot die tweede plek teruggesak, terwyl Bond Street in Londen op sy beurt Tsim Sha Tsui in Hongkong verbygesteek het.

Bly ingeskakel vir meer nuus……………….