Goeie Nuus

BULLETIN NUUSAGENTSKAP 16 Oktober

Goeiemiddag. Hier is jou Goeie Nuus:

# Die Vrystaatse Universiteit se Sentrum vir Omgewingsbestuur het sy 30ste bestaansjaar gevier. Die sentrum, wat in 1994 gestig is, het met net vier studente begin, maar verwelkom tans jaarliks byna 50 studente. Die hoof van die sentrum, Olusola Ololade, sê hulle het 592 meestersgrade moontlik gemaak, 19 doktorsgrade in Omgewingsbestuur, en 126 honneursgrade en nagraadse diplomas in Geïntegreerde Waterbestuur. Sy sê hulle spog ook met ‘n uiteenlopende en internasionale studenteliggaam wat 18 lande verteenwoordig. 

# ​Twee studente van die Universiteit van die Witwatersrand, Swelihle Sibiya en Andile Mgomezulu, is onder die wenners van die Suider-Afrika Telekommunikasienetwerke en -toepassingskonferensie se Bedryfsoplossingsuitdaging. Meer as 300 studente uit alle dele van Suider-Afrika het ingeskryf vir dié jaar se kompetisie, waar nagraadse en voorgraadse studente vernuwende oplossings ontwikkel vir bedryfsgeïnspireerde uitdagings. Sibiya, wat studeer vir ‘n meestersgraad in Geografiese Inligtingstelsels, het die Navorsing- en Ontwikkelingsuitdaging gewen. Mgomezulu, ‘n derdejaarstudent in Lugvaartkunde-ingenieurswese, het die Huawei-uitdaging gewen.

# Pretoria bied later die maand Resolute Roboticon aan, wat ‘n koderings- en robotika-kompetisie is. Dit word gereël deur Resolute Education en Oxford University Press South Africa, en bring meer as 600 leerders van 70 skole wêreldwyd byeen. Vanjaar se tema, City of the Future, daag studente uit om na vore te kom met moderne oplossings vir werklike wêreldprobleme. Deelnemers sal besig wees met multidissiplinêre leer en spanwerk, met kategorieë vir verskillende ouderdomsgroepe wat uitloop op tegnologiepryse vir die wenners.

# Kaapstad se onderburgemeester, Eddie Andrews, neem Sondag deel aan die Kaapstadse marathon, en bevorder sy Soles for Souls-veldtog. Dit is ‘n poging om 42-duisend-200 pare skoolskoene te verskaf vir kinders in nood reg oor Kaapstad. Andrews sê hy werk saam met die Santa-skoenboksprojek en die aanlyn fondsinsamelingsplatform GivenGain:

# ​En ten slotte: Die bekroonde Amerikaanse sangeres en liedjieskrywer, Taylor Swift, gaan op 29 November ʼn boek bekendstel om haar Eras-toer wat rekords verbeter het, te herdenk. Die Eras Tour Book van 256 bladsye bevat nuwe foto’s van die toer en stories en herinneringe van Swift self. Sy gaan ook haar nuwe album, The Tortured Poets Department: The Anthology as langspeelplaat vrystel. Dit sluit al 31 liedjies van haar dubbelalbum in wat vroeër vanjaar vrygestel is, asook vier bonussnitte.

Bly ingeskakel vir meer nuus……………….