Goeie Nuus

BULLETIN NUUSAGENTSKAP 4 September

Goeiemiddag. Hier is jou Goeie Nuus:

# Die Suid-Afrikaanse aktrise Nomzamo Mbatha en die seun van die ontslape wildkenner Steve Irwin, Robert, is aangewys as die eerste Earthshot Global-ambassadeurs. Prins William en die natuur-geskiedkundige David Attenborough het die Earthshot-prys in 2020 bekendgestel om vernuwende oplossings vir klimaatsverandering te vind. Die prins van Wallis ken van 2021 tot 2030 die prys aan vyf wenners toe saam met ‘n paneel wat die ses vastelande verteenwoordig. Die toekenningsplegtigheid, wat voorheen in Londen, Boston en Singapoer gehou is, sal vanjaar in Kaapstad plaasvind.

# Kaapstad en Shanghai in China is saam in die sewende plek op die ranglys van die mees bekostigbare stede in die wêreld om te besoek. Die reisagent Bounce het inligting oor die 75 gewildste bestemmings in die wêreld versamel deur die koste van hotelkamers per nag op ‘n Vrydag en Saterdag, die prys van maaltye by goedkoop restaurante en die koste van alkohol en vervoer, in ag te neem. Timisoara in Romenië is bo aan die lys, gevolg deur Buenos Aires in Argentinië en derde is Baku in Azerbeidjan.

# ‘n Ontluikende kunstenaar, Thandabantu Matola, het die top tien van die nasionale kunskompetisie, New Sasol Signatures, gehaal. Die 28-jarige gegradueerde in Beeldende Kunste van die Walter Sisulu-universiteit is gekies uit ‘n groep van meer as ‘n duisend opkomende kunstenaars. Die universiteit sê Matola se weninskrywing is ‘n weerspieëling van die simbole van armoede wat dikwels misgekyk word, deur vadoeke te gebruik om ‘n kragtige verhaal van deursettingsvermoë te skilder. Die voorsitter van die kompetisie, Pfunzo Sidogi, sê die tien kunswerke wat gekies is, kan kers vashou by enige groot plaaslike of internasionale kunsuitstalling of -fees.

# Die Tshwane Universiteit vir Tegnologie het ‘n dinamiese en treffende veldtog, die #Twentyfrom20-fondsinsamelingsveldtog bekendgestel. Die doel is om 1,2-miljoen-rand in te samel vir drie van die instelling se belangrike projekte. Dit is die Ndumo-gemeenskapsprojek in KwaZulu-Natal, die ICT Intervarsity Hackathon-reeks en die Graad R Sentrum van Uitnemendheid: Vroeëkinderjare-ontwikkeling. Die veldtogbestuurder, Phumla Msibi, sê hulle sal hulle tot 30 November beroep op die vrygewigheid van 60 maatskappye wat onderneem om elk 20-duisend-rand te skenk.

# En ten slotte: Die Colour Your Passion-kunsveiling het drie-duisend-200-rand ingesamel vir Dance For All in Kaapstad. Dis ʼn organisasie sonder winsbejag wat dansklasse aanbied vir minderbevoorregte kinders. Die veiling het vrouebemagtiging gevier en aanwesiges is aangemoedig om ʼn spatsel kleur op ʼn groot skilderdoek aan te bring voor dit opgeveil is. Colour Your Passion se direkteur, Shantelle Engelbrecht, sê elke geleentheid wat hulle aanbied het ʼn liefdadigheidsafdeling.

Bly ingeskakel vir meer nuus……………….