Eko-minuut 13:30

BULLETIN NUUSAGENTSKAP 11 Desember 1:30 nm

Goeiemiddag. Hier is jou Eko-minuut:

# Die Nasionale Kernreguleerder het die publiek genooi om kommentaar te lewer oor Eskom se voorstel om sy kortstondige tussentydse bergingsgerieflisensie by die Koeberg-kernkragstasie in Kaapstad te wysig. Die kragnutsmaatskappy wil ‘n gebruikte brandstof-vatbergingsgerief byvoeg by die bestaande bergingsgerief. Die publiek het 60 dae om kommentaar in te dien oor die omgewings-, gesondheids- en veiligheidskwessies van Eskom se versoek.

# Wildlife ACT werk saam met CHEP, ‘n leier in volhoubare voorsieningskettingoplossings om renosters in Suid-Afrika te beskerm. Hulle wil saam fokus op noodsaaklike bewaringspogings soos onthoring, die hervestiging van weesrenosters en die naspoor van hulle bewegings. Daarby beplan hulle om plaaslike gemeenskappe te betrek om volhoubare bewaringspraktyke te verseker. Volgens die organisasies is daar minder as ses-duisend-200 swartrenosters oor, terwyl witrenostergetalle ontstellend afneem. Dit is ‘n wekroep aan Suid-Afrika om renosterbeskerming te verbeter en volhoubare ontwikkeling te bevorder.

# En ten slotte: Die getal luiperds het verdriedubbel in die wêreld se grootste bewaringsgebied, die Kafue-nasionale park in Zambië. Die park spog tans met 4,4 luiperds per 100 vierkante kilometer. Die park maak gebruik van kameras om die diergetalle te monitor, asook slimmer teen-stropingspatrollies en GPS-toestelle op witrugaasvoëls om op te tree as ‘n vroeë waarskuwingstelsel vir potensiële stropery. Hierdie stappe het ook gelei tot ‘n ommekeer in die afname van die leeubevolking. Luiperds word gelys as kwesbaar op die Internasionale Unie vir Natuurbewaring se rooilys van bedreigde spesies.

Bly ingeskakel vir meer nuus……………….