Goeie Nuus 14:00
BULLETIN NUUSAGENTSKAP 5 Februarie 2 nm
Goeiemiddag. Hier is jou Goeie Nuus:
# Die minister van Sport, Kuns en Kultuur, Zizi Kodwa, het die Suid-Afrikaanse sanger en liedjieskrywer Tyla gelukgewens met haar eerste Grammy-toekenning. Die 22-jarige het in die nuwe kategorie, Beste Afrika-musiekuitvoering gewen met haar groot treffer, Water. Die ministerie se woordvoerder, Litha Mpondwana, sê Suid-Afrika het sterk verteenwoordiging gehad by die Grammys, met Trevor Noah wat vir ‘n vierde keer gasheer was én benoem is vir Beste Komedie-album, terwyl die a-capella-groep, Just 6, én Musa Keys ook benoem is:
# ’n Nie-winsgewende organisasie, Nal’ibali, sê hulle beoog om Woensdag drie miljoen kinders regdeur Suid-Afrika te bereik as deel van Wêreld Leesdag. Dié dag fokus op die belangrikheid van lees, wat geletterdheid en woordeskat uitbrei, én op die deel van stories. Die Stad Kaapstad se biblioteke bied Woensdag spesiale programme aan. Die burgemeesterskomiteelid vir Gemeenskapsdienste en Gesondheid, Patricia van der Ross, sê hulle wil ‘n leeskultuur onder kinders vestig en dit begin met luister na stories wat hardop voorgelees word.
# Honderde Suid-Afrikaanse skole neem deel aan die “Broodknippie vir Rolstoele”-uitdaging van die Rolstoelstigting en die Wildlife and Environment Society of South Africa Eco-Schools. Leerders wat deelneem word aangemoedig om soveel as moontlik broodknippies bymekaar te maak wat dan herwin word om rolstoele vir behoeftige mense te vervaardig. Die stigting sê buiten die veldtog se basiese doelwit om mense met beweeglikheid te help, bevorder dit ook omgewingsbewustheid.
# Verskeie skole in Mamelodi het onlangs ‘n skenking van boeke, kussings en uniforms vir verskillende sportsoorte ontvang, as deel van Ford Suid-Afrika se Silverton-fonds ter waarde van 1,36-miljoen-rand. Die fonds fokus op die bemagtiging van skole deur die READ Educational Trust se Rally-to-Read-projek. Die Zamintuthuko en Boikgantso laerskole was onder die begunstigdes. Esther Buthelezi van Ford, sê ‘n verbetering in geletterdheid en liefde vir lees is duidelik by die leerders, terwyl die onderwysers beter toegerus is met vaardighede om effektiewe onderwys in elke leerfase te verskaf .
# Lee Ann Mudzamba van die Universiteit van Fort Hare is op pad na die Verenigde Koninkryk om as oudit-kandidaat by Deloitte, een van die wêreld se grootste rekeningkundige firmas, te gaan werk. Die 23-jarige het ‘n BCom in Rekeningkunde en ʼn nagraadse diploma in Rekeningkunde. Die Suid-Afrikaanse Instituut vir Geoktrooieerde Rekenmeesters se driejaar-graadprogram by Deloitte Londen bied aan kandidate geleentheid om hulle leerkontrakte as geoktrooieerde rekenmeesters op ʼn internasionale platform te voltooi. Lee Ann sê sy wou altyd grense verskuif om geleenthede te soek.
Bly ingeskakel vir meer nuus……………….