Nuus 16:00

BULLETIN 15 April 4 nm

Goeiemiddag. Ek is……..

In die bulletin:

# ‘n Finansiële groep sê die verlaging in die brandstofheffing bring slegs tydelike verligting
# Sadou veroordeel die aanvalle op onderwysers in Ekurhuleni, Gauteng
# En tennis: Alcaraz is steeds op koers om Sondag weer die wêreld-nommer-een te word

# Die EBC-finansiële groep waarsku Suid-Afrika se verlaging van die brandstofheffing van drie-rand per liter bring slegs kortstondige verligting aangesien stygende wêreldwye oliepryse en ‘n swakker rand steeds inflasie aandryf weens die voortdurende konflik in die Midde-Ooste. Ontleder David Precious sê dieselkoste, gekoppel aan Brent-ru-olie en dollarpryse, bly die grootste kommer. Hy waarsku hoër brandstofpryse sal na verwagting vervoer- en uitvoerkoste verhoog, wat verdere druk op die ekonomie sal plaas en die uitwerking van tydelike belasting-verligtingsmaatreëls sal beperk.

# FNB sê Suid-Afrika se mynbousektor het in Februarie sterk groei aangeteken, met ‘n styging op ‘n jaargrondslag van 9,7-persent. Die toename is hoofsaaklik aangedryf deur ‘n skerp styging in die produksie van platinumgroepmetale, tesame met winste in chroom, mangaan en goud. Die ekonoom Thanda Sithole sê hoewel produksie maandeliks gegroei het, het die sektor steeds ‘n effense afname oor die afgelope drie maande getoon:

# Build One South Africa kritiseer die regering omdat daar nie opgetree is teen wat hy oormatige besteding aan BBP-beskermingsdienste noem nie, en sê dringende hervormings is nodig om verkwistende uitgawes te verminder. Roger Solomons van die party sê miljarde-rand word bestee aan die beskerming van politieke magsfigure terwyl basiese dienste worstel met begrotingsbeperkings. BOSA beweer die regering het geen beduidende maatreëls getref om die toewysing te hersien of te verminder nie. Solomons vra ‘n deursigtige oudit en ferm optrede teen openbare besteding.

# Die onderwysersvakbond Sadou veroordeel die aanvalle op onderwysers in Ekurhuleni, Gauteng, nadat een doodgeskiet en ‘n tweede ernstig beseer is. Woordvoerder Nomusa Cembi sê ‘n personeellid van die Barcelona Primary School, Tshepo Mankge, is doodgeskiet toe hy skool toe gestap het, en die onderhoof van die Lethulwazi Comprehensive School, Kenneth Mandoyi, is gewond. Sy sê bykans tien onderwysers is sedert 2023 in die gebied dood, en bepleit dringende optrede:

# Tennis: Die plaaslike held, Carlos Alcaraz, is steeds op koers om weer wêreld-nommer-een te word wanneer die Barcelona-ope in Spanje Sondag afsluit. Hy moes die posisie aan Jannik Sinner prysgee toe die Italianer hom verlede naweek in die eindstryd van die Monte-Carlo-meesterstoernooi in Monaco geklop het. Alcaraz het die Finse kwalifiseerder Otto Virtanen maklik geklop in sy eerste wedstryd en speel volgende teen Tomas Machac van die Tsjeggiese Republiek​​​. Sinner speel nie dié week nie en sal na verwagting volgende week in Madrid na die baan terugkeer.

# En die finansiële aanwysers: Die rand verhandel teen 16-rand-42-sent teen die dollar, 19-rand-35-sent teen die euro en 22-rand-25-sent teen die pond. Bitcoin verhandel teen 74-duisend-197-dollar. Die prys van goud is vier-duisend-810-dollar-93-sent per fynons en die prys van Brent-ruolie is 92-dollar-89-sent per vat

Bly ingeskakel vir meer nuus……………….