Nuus 18:00

BULLETIN 26 Maart 6 nm

Goeiemiddag. Ek is……..

In die bulletin:

# Die presidensie sê Amerikaanse druk het Frankryk beïnvloed om president Cyril Ramaphosa se uitnodiging na die G7-beraad terug te trek
# Die Suid-Afrikaanse Reserwebank hou die terugkoopkoers onveranderd op 6,75%
# En, die Departement van Minerale en Petroleum Hulpbronne distansieer hom van opmerkings oor afstandwerk te midde van stygende brandstofkoste

# Die presidensie sê Amerikaanse druk het Frankryk se besluit beïnvloed om president Cyril Ramaphosa se uitnodiging om die G7-beraad in Junie in Evian by te woon, terug te trek. Volgens die presidensie het Washington gedreig om die beraad te boikot as Suid-Afrika ingesluit word, wat daartoe gelei het dat Frankryk ‘n uitnodiging wat aanvanklik deur president Emmanuel Macron uitgereik is, teruggetrek het. Die woordvoerder van die presidensie, Vincent Magwenya, sê Ramaphosa aanvaar die besluit en sal voortgaan om geskille deur konstruktiewe dialoog op te los, en sê dit sal nie die sterk bilaterale bande met Frankryk beïnvloed nie.

# Die Suid-Afrikaanse Reserwebank se Monetêre Beleidskomitee het die terugkoopkoers onveranderd gelaat op 6,75-persent. Die bank sê die besluit weerspieël voortdurende wêreldwye onsekerheid, insluitend stygende oliepryse as gevolg van die Midde-Oosterse konflik, wat na verwagting ‘n styging in korttermyn inflasie sal veroorsaak. Die President van die Reserwebank, Lesetja Kganyago, sê hoewel inflasie waarskynlik tydelik sal styg, behoort dit mettertyd terug te keer na die drie-persent-teiken:

# Die Departement van Minerale en Petroleum Hulpbronne het verduidelik dat werk van die huis af nie ‘n amptelike regeringsreaksie op stygende brandstofkoste is nie. Dit volg nadat die direkteur van Brandstofpryse, Robert Maake, afstandwerk voorgestel het as een van moontlike maniere waarop verbruikers stygende brandstofkoste kan behartig. Lerato Ntsoko van die Departement sê geen opdrag is uitgereik nie, en enige formele beleidsbesluite oor brandstofpryse of lewenskoste-maatreëls sal deur amptelike kanale gekommunikeer word:

# Indië se parlement het ‘n omstrede wetsontwerp aanvaar wat daarop gemik is om te verander hoe transgender mense wettig erken word en die reg om hulself te identifiseer. Die regering sê die verandering sal welsynsvoordele meer toeganklik maak en ‘n bestaande wet teen uitbuiting en mensehandel versterk. Kritici waarsku egter dit kan baie transgender-, nie-binêre en geslagsvloeibare mense uitsluit. Lede van die transgender gemeenskap het die afgelope week verskeie byeenkomste en versetoptredes teen die wetsontwerp gehou. Aktiviste sê die nuwe wetsontwerp kan die manier hervorm waarop transgender mense wettig erken word.

# Motorsport: Lewis Hamilton het op 41 ‘n nuwe wip in sy stap en sê hy is nou meer toegewyd aan Formule Een as ooit tevore en glo hy oefen harder as enige ander jaer. Die sewemalige wêreldkampioen het die seisoen sterk begin met Ferrari en is vierde in die kampioenskap na twee wedrenne, 18 punte agter die voorloper George Russell van Mercedes. Hamilton se eerste seisoen by Ferrari verlede jaar was ‘n nagmerrie. Dinge het hierdie seisoen egter merkbaar verbeter, met die nuwe regulasies en motorontwerpe, wat lei tot meer verbysteekgeleenthede tydens wedrenne as wat onlangs moontlik was.

# En die finansiële aanwysers: Die rand verhandel teen 17-rand-1-sent teen die dollar, 19-rand-65-sent teen die euro en 22-rand-74-sent teen die pond. Bitcoin verhandel teen 69-duisend-573-dollar. Die prys van goud is vier-duisend-458-dollar-77-sent per fynons en die prys van Brent ruolie is 100-dollar-87-sent per vat.

Bly ingeskakel vir meer nuus………………