Nuus 07:00

BULLETIN 12 Maart 7 vm

Goeiemôre. Ek is……..

In die bulletin:

# Zane Dangor sê ambassadeur Bozell is spyt oor sy onlangse opmerkings
# Fikile Mbalula sê Suid-Afrika sal nie deur die VSA voorgeskryf word oor sy beleidsbesluite nie
# En die Britse premier word gewaarsku oor ‘n risiko vir sy reputasie oor Mandelson

# Die Departement van Internasionale Betrekkinge en Samewerking se direkteur-generaal, Zane Dangor, sê Amerika se ambassadeur in Suid-Afrika, Leo Brent Bozell, het verskoning gevra vir sy onlangse opmerkings. Bozell het by ’n Biznews-konferensie gesê Amerika se geduld raak op oor Suid-Afrika se standpunte oor belangrike kwessies soos sy buitelandse beleid en grondonteiening. Dangor sê Bozell het gesê hy wil voortgaan om saam met die regering te werk en ’n wedersyds voordelige verhouding tussen die twee lande te bou:

Die ANC se sekretaris-generaal Fikile Mbalula sê intussen Suid-Afrika se beleid oor internasionale betrekkinge sal net deur landsburgers en die regering bepaal word. Bozell word gestriem oor opmerkings oor die land se buitelandse beleid en binnelandse wette. Hy het gesê Amerika se geduld raak op met die regering se onwilligheid om vyf punte van sy binnelandse en buitelandse beleid aan te pas. Mbalula sê Suid-Afrika glo aan ’n multipolêre wêreld wat internasionale reg respekteer.

# Die Organisasie teen Belastingmisbruik sê staatsondernemings het tussen 2008 en 2023 reddingsboeie van 520-miljard-rand van die regering ontvang, maar raadslede se vergoeding is nie in ooreenstemming met prestasie nie. Die organisasie se nuwe verslag onthul nie-uitvoerende raadslede van Eskom, Transnet en die Suid-Afrikaanse Lugdiens, se vergoeding is nie deurlopend deursigtig nie, is blootgestel aan politieke inmenging, en hou selde verband met prestasie. OUTA se woordvoerder, Robyn Pasensie, sê belastingbetalers dra die koste terwyl rade nie die gevolge van swak prestasie dra nie:

# Die voormalige nasionale adjunkkommissaris van Polisie vir ondersteuningsdienste, Francinah Vuma, sê die nasionale kommisaris van Polisie, Fannie Masemola het haar kantoor deursoek kort nadat sy in Julie 2022 geskors is. Vuma, wat getuig voor die parlementêre ad hoc-komitee wat bewerings van misdaad en korrupsie in die regstelsel ondersoek, sê Masemola het beslag gelê op dokumente uit haar kantoor. Sy het bygevoeg sy was vir meer as drie jaar geskors sonder ‘n dissiplinêre verhoor totdat sy in Februarie 2026 afgetree het.

# Die Verenigde Koninkryk se eerste minister, Keir Starmer, is gewaarsku teen skade aan sy reputasie nadat hy Peter Mandelson as ambassadeur in Amerika aangestel het, ten spyte van bande met die seksoortreder, wyle Jeffrey Epstein. Die eerste stel dokumente van Mandelson se aanstelling is gister vrygestel. Volgens die dokumente het Epstein se verhouding met Mandelson voortgegaan nadat eersgenoemde in 2008 skuldig bevind is in ’n saak oor ’n minderjarige meisie. Starmer se hoofsekretaris, Darren Jones, het aan die Laerhuis gesê Mandelson se versoek oor ’n skeidingspakket was onaanvaarbaar:

# Krieket: Die krieketbeheerliggaam het Woensdag bewerings van onregverdige behandeling verwerp nadat die Wes-Indiese Eilande en Suid-Afrika vir meer as ‘n week ná die T20-Wêreldbeker in Indië gestrand was. Volgens die IKR is reisbesluite geneem met veiligheid, uitvoerbaarheid en welsyn in gedagte. Lugdienste het vlugte gekanselleer of herlei weens die oorlog in die Midde-Ooste, wat internasionale reisskedules in chaos gedompel het. Engeland het 36 uur na hul halfeindstryd verlede week vertrek, terwyl die Wes-Indiese Eilande en Suid-Afrika meer as ‘n week in Kolkata gebly het nadat hulle by die toernooi uitgeskakel is.

# En die finansiële aanwysers: Die rand verhandel teen 16-rand-55-sent teen die dollar, 19-rand-12-sent teen die euro en 22-rand-17-sent teen die pond. Bitcoin verhandel teen 69-duisend-96-dollar. Die prys van goud is vyf-duisend-158-dollar-66-sent per fynons en die prys van Brent ruolie 94-dollar-93-sent per vat.

Bly ingeskakel vir meer nuus……………….