Nuus 08:00

BULLETIN 7 Februarie 8 vm

Goeiemôre. Ek is……..

In die bulletin:

# Kommissaris Fannie Masemola sê tugondersoeke vir beamptes wat by die Madlanga-kommissie betrek is, is aan die gang
# Donald Trump veroordeel ‘n rassistiese video van die Obamas, maar weier om verskoning te vra
# En krieket: Pakistan en Nederland skop vandag die T20 Wêreldbeker in Colombo af

# Die nasionale kommissaris van Polisie, Fannie Masemola sê dissiplinêre ondersoeke is aan die gang teen verskeie polisiebeamptes wat tydens getuienis by die Madlanga-kommissie en die parlementêre ad hoc-komitee genoem is. Een beampte is reeds geskors, terwyl ander vir skorsing oorweeg word. Masemola het aan die media gesê ‘n taakspan is saamgestel om bewyse te hersien en dissiplinêre stappe aan te beveel. Hy sê dit bewys dat die ministerie van Polisie ernstig is doen om beamptes aanspreeklik te hou:

# Die vakbond Solidariteit sê 233 werkers se toekoms is onseker nadat British American Tobacco nie duidelike antwoorde aan Suid-Afrika verskaf het oor moontlike afleggings nie. Dit volg na die beplande sluiting van die maatskappy se Heidelberg-vervaardigingsaanleg in Gauteng. Die vakbond sê werkers is vasgevang tussen die regering se mislukking om die onwettige tabakhandel te bekamp en ‘n ondeursigtige konsultasieproses. Dana Grové van Solidariteit vrees dat die sluitingsbesluit waarskynlik reeds in die buiteland geneem is:

# Die O.R. Tambo Internasionale Lughawe in Kempton Park, Gauteng, sê hulle maak goeie vordering met hul opgraderingsprogram van 14,5-miljard-rand wat daarop gemik is om die passasierservaring te verbeter. Die werk, wat gegrond is op terugvoer deur passasiers, sluit in nuwe sitplekke, verbeterde aanwysings, opgegradeerde roltrappe en instap-areas,  en verbeterde toiletgeriewe. Die lughawebestuurder, Jabu Khambule, sê fase een van die toiletopgraderings sal teen Maart volgende jaar voltooi wees, met meer werk wat van Julie af beplan word. Hy sê die opgraderings sal gemak, veiligheid en doeltreffendheid vir reisigers verbeter.

# Die DA in die Wes-Kaap sê alle vlakke van regering moet saamwerk om vinnig op rampe te reageer en gemeenskappe te beskerm. Die party het die nasionale regering se aankondiging verwelkom dat die voortdurende droogte as ‘n nasionale ramp verklaar word, wat hulpbronne vir boere, plaaslike regerings en inwoners wat sukkel met watertekorte sal ontsluit. Dave Bryant van die DA vra ook vir dringende optrede om hierdie somer se veldbrande as ‘n ramp te klassifiseer:

# President Donald Trump het ‘n video wat op sy sosiale media-rekening geplaas is, veroordeel wat die voormalige Demokratiese president Barack Obama en die presidentsvrou Michelle Obama as ape uitbeeld, nadat dit wydverspreide kritiek uitgelok het. Die Withuis het die plasing eers verdedig en dit vroeg gister, 12 uur nadat dit verskyn het, verwyder. Die minuut lange video wat op Trump se Truth Social-netwerk gedeel is, het valse bewerings versterk dat sy 2020-verkiesingsnederlaag die gevolg van bedrog was. Naby die einde van die video is ‘n skynbaar KI-gegenereerde snit van dansende primate wat die Obamas se gesigte vertoon.

# En krieket: Pakistan en Nederland skop vanoggend die T20 Wêreldbeker in die Sri Lankaanse hoofstad, Colombo af. Dit is een van drie wedstryde wat op die openingsdag gespeel word met Skotland wat teen die Wes-Indiese Eilande op Eden Gardens in die Indiese stad Kolkata te staan kom, terwyl Indië en Amerika mekaar in Wankhede pak. Suid-Afrika speel teen Kanada, Afghanistan, Nieu-Seeland en die Verenigde Arabiese Emirate in sy groepwedstryde, met die eerste een Maandag teen Kanada in Ahmedabad, Indië.

Bly ingeskakel vir meer nuus……………….