Nuus 16:00

BULLETIN 15 Januarie 4 nm

Goeiemiddag. Ek is……..

In die bulletin:

# Die Weerdiens reik waarskuwings uit vir swaar reën in Limpopo en Mpumalanga
# ‘n Vier-en-dertigjarige word Oekraïne se jongste minister ooit
# En tennis: Moeilike wedstryde word verwag vir Keys, Sabalenka en Swiatek in die Australiese Ope

# Die Suid-Afrikaanse Weerdiens het ernstige waarskuwings uitgereik vir swaar reën in die oostelike dele van Limpopo en Mpumalanga, met ontwrigtende reën wat na verwagting oor die volgende twee dae sal voortduur. Die waarskuwings sluit hoë vlakke van reën in wat kan lei tot die oorstroming van strate en nedersettings, sowel as modderstortings en rotsstortings in kwesbare gebiede. Inwoners word versoek om voorsorgmaatreëls te tref, laagwaterbrûe te vermy en nie oorstroomde strate oor te steek nie, want aanhoudende reën beïnvloed reis- en veiligheidstoestande.

Mpumalanga se Onderwysdepartement het intussen besluit om klasse in die Bosbokrand-munisipaliteit vandag en môre op te skort weens die aanhoudende reën wat groot uitdagings skep met ontoeganklike paaie. Die departement se woordvoerder, Gerald Sambo, sê die raad aan skole om goeie oordeel te gebruik, bly van krag in alle gebiede waar dit tans reën:

# Die Foundation for Education and Social Justice Africa sê ‘n Graad 12-leerder van Sunrise High School in Diepsloot, Gauteng, is onregverdig verhoed om matriek te voltooi. Wesly Ratlhaha, wat na ‘n ongeluk in ‘n rolstoel is, was akademies voorbereid om die eksamen te skryf, maar die skool het geweier om die nodige aanpassings te maak. Hendrick Makaneta van die stigting sê dit is diskriminerend en ongrondwetlik:

Nuus uit die buiteland: 

# Oekraïne se voormalige adjunk-eerste minister en huidige minister van Digitale Hervorming, Mikhailo Fedorov, sal die leisels oorneem as hoof van die land se Ministerie van Verdediging. ‘n Meerderheid parlementslede het met die tweede poging ten gunste van sy aanstelling gestem. President Volodimir Zelensky het sy besluit vooraf geregverdig deur te beklemtoon dit is nodig om maksimum tegnologiese vermoë vir die Weermag te verseker ingeval diplomatieke pogings misluk en Rusland se aanslag voortduur. Die 34-jarige Federov is die jongste minister in die land se geskiedenis.

# Tennis: Die Amerikaner Madison Keys begin die verdediging van haar Australiese Ope-titel teen Oleksandra Oliynykova van Oekraïne, wat haar buiging in die hooftrekking maak. Keys kan te staan kom teen haar landgenote Jessica Pegula en Amanda Anisimova in onderskeidelik die vierde en die kwarteindronde. Wêreld-nommer-een, Aryna Sabalenka van Belarus, wat mik na ‘n derde titel in Melbourne, kan die Amerikaner Coco Gauff in die halfeindronde ontmoet. Iga Swiatek van Pole, wat mik na ‘n loopbaan-Grand Slam, kan die moeilike teenstander Naomi Osaka van Japan in die vierde ronde verwag.

# En die finansiële aanwysers: Die rand verhandel teen 16-rand-35-sent teen die dollar, 19-rand-3-sent teen die euro en 21-rand-94-sent teen die pond. Bitcoin verhandel teen 96-duisend-602-dollar. Die prys van goud is vier-duisend-617-dollar-85-sent per fynons en die prys van Brent-ruolie is 63-dollar-78-sent per vat.

Bly ingeskakel vir meer nuus……………….