Nuus 17:00

BULLETIN NUUSAGENTSKAP 17 Januarie 5 nm

Goeiemiddag. Ek is……..

In die bulletin:

# Die ATM bepleit dringende ekonomiese hervorming om stygende werkloosheid die hoof te bied
# ‘n Gautengse LUR moedig ouers aan om hul kinders na township-skole te neem
# En, tennis: Die meeste topgekeurdes vorder in die Australiese Ope

# Die African Transformation Movement het diepe kommer uitgespreek oor die skokkende styging in die werkloosheidsyfer in Suid-Afrika. Hy sê dit is vererger deur ‘n onderwysstelsel wat nie daarin slaag om vaardighede oor te dra wat ooreenstem met die land se ekonomiese sterkpunte, soos landbou en mynbou nie. Die ATM se woordvoerder, Zama Tshona, sê in reaksie op hierdie veelvlakkige uitdaging vra die party ‘n omvattende benadering wat daarop gemik is om plaaslike nywerhede te laat herleef en volhoubare werksgeleenthede te skep:

# Die Gautengse LUR vir Onderwys, Matome Chiloane, het ouers versoek om hul kinders by township-skole in te skryf, met die klem op hul rol as ‘n grondslag vir sukses. Ouers worstel met uitdagings om skoolplasings te vind, en Chiloane waarsku daarteen om township-skole mis te kyk. Hy het op die eerste dag van die 2024-akademiese jaar by die Hoërskool Kgatoenhle in Ga-Rankuwa, Pretoria, gepraat. Chiloane het die suksesverhale van baie Suid-Afrikaanse leiers uitgelig wat hul opleiding in township-skole ontvang het, en ouers aangemoedig om hierdie opvoedkundige instellings te omhels:

# Die ANC vra Amerika moet onmiddellik sy besetting van Guantánamobaai in die Karibiese Eilande beëindig. Amerika het gebiedsbeheer van die suidelike deel ingevolge ‘n huurooreenkoms van 1903. Die land het jurisdiksie en beheer oor die gebied van die Vlootbasis Guantánamobaai. Die adjunkpresident van die ANC, Paul Mashatile, het hierdie oproep gedoen op die sewende Afrika-Kuba-solidariteitkonferensie in Witrivier, Mpumalanga. Hy het benadruk die ANC-regering is verbind tot geregtigheid, internasionalisme en demokrasie.

# Ongeveer 225 mense het sedert Julie verlede jaar aan hongersnood gesterf in die Tigray-streek in Ethiopië, met gebiede soos Edaga Arbi en die Adwa-dorp wat die ergste geraak is. Humanitêre amptenare sê baie van die slagoffers is kinders en jongmense. Die Netwerk vir Vroeë hongersnood-waarskuwingstelsels waarsku die voedselkrisis, wat vererger is deur droogte en oorlog, staan op die punt om teen die middel van hierdie jaar ‘n landwye noodgeval te word. ‘n Humanitêre ontleder, Alex de Waal, waarsku sonder vinnige optrede kan ‘n halfmiljoen mense of meer in die komende jaar weens hongersnood sterf.

# Tennis: Verskeie top-tien-spelers het vandag in die tweede ronde van die Australiese Ope gespeel, en daar was maklike oorwinnings vir die plaaslike speler Alex de Minaur, die Italianer Jannik Sinner en die Rus Andrey Rublev. Stefanos Tsitsipas van Griekeland het vier stelle nodig gehad om te wen. Onder die vroue het die wêreld nommer twee, Aryna Sabalenka van Belarus, maklik deurgedring na die derde ronde, saam met die vierde-gekeurde Amerikaner Coco Gauff, wat haar landgenoot Caroline Dolehide verslaan het. Die 19-jarige is tevrede met haar vertoning:

# En die finansiële aanwysers: Die rand verhandel teen 19-rand-7-sent teen die dollar, 20-rand-72-sent teen die euro en 24-rand-15-sent teen die pond. Bitcoin verhandel teen 42-duisend-642-dollar-15-sent. Die prys van goud is twee-duisend-en-24-dollar-90-sent per fynons en die prys van Brent-ruolie 76-dollar-62-sent per vat.

Bly ingeskakel vir meer nuus……………….