Nuus 11:00

BULLETIN 31 Augustus 11 vm

Goeiemôre. Ek is……..

In die bulletin:

# Die SAKP eis ‘n einde aan Amerikaanse sanksies en militêre optrede
# Motoriste kan ‘n daling in brandstofpryse in September verwag
# En Jemen se Houthi-premier is in ‘n Israelse lugaanval dood

# Die Suid-Afrikaanse Kommunistiese Party het die Verenigde State versoek om sanksies teen Iran op te hef, militêre optrede in Venezuela te staak en nie meer wapens aan Israel te verskaf nie. SAKP-woordvoerder Mbulelo Madlana het gister president Donald Trump se besluite oor menseregte tydens ‘n betoging buite die Amerikaanse konsulaat in Johannesburg veroordeel. Hy sê die betoging was daarop gemik om druk op die VSA te plaas om menseregte te handhaaf. Hy het ook die negatiewe uitwerking van tariewe op Suid-Afrika beklemtoon:

# Die Activists and Citizens Forum het die waarnemende polisieminister, Feroz Chachalia, beskuldig dat hy die nasionale polisiekommissaris Fannie Masemola in die openbaar gekritiseer het oor 121 dossiere wat verband hou met politieke moorde in KwaZulu-Natal. Woordvoerder Dennis Bloem het Masemola se vinnige optrede oor die besluit geprys en gesê geregtigheid moet geskied. Hy het Chachalia gewaarsku om nie in te meng nie, aangesien sommige van die dossiere glo gereed is vir die uitvoer van arrestasies:

# Motoriste kan volgende week verligting verwag met die Departement van Minerale Bronne en Energie se aankondiging van brandstofprysaanpassings vir September. Voorlopige data van die Sentrale Energiefonds dui op ‘n daling van vier-sent vir 95-graad petrol en ‘n afname van 12-sent vir 93-graad. Diesel sal na verwagting met 55-sent per liter daal, terwyl paraffien met 37-sent kan daal. Die dalings word gedryf deur ‘n bestendige rand-dollar-wisselkoers en laer wêreldwye oliepryse.

# Tax Justice SA het die regering versoek om onwettige handel tot ‘n nasionale noodtoestand te verklaar nadat ‘n nuwe verslag van die Afrika-Unie onthul het dat Suid-Afrika daagliks meer as 250-miljoen-rand aan misdaadsindikate verloor. Onwettige sigarette kos jaarliks ​​28-miljard-rand, terwyl onwettige alkohol 16,5-miljard-rand dreineer. Stigter Yusuf Abramjee het gewaarsku dat die krisis burgers beroof van skole, hospitale en huise. Hy sê swak wetstoepassing en die gebrek aan politieke belangstelling is die oorsaak. Abramjee sê misdadigers tree straffeloos op terwyl Suid-Afrikaners die prys betaal en eis dringende optrede van die regering.

# Jemen se Houthi-rebelle het gister onderneem om wraak te neem vir die dood van hul eerste minister en ander politieke leiers in Israelse lugaanvalle vroeër hierdie week. Die Houthi’s het bevestig dat eerste minister Ahmed al-Rahawi Donderdag in ‘n aanval op die Jemenitiese hoofstad Sana’a dood is. Ander is ook ernstig gewond. Al-Rahawi is die mees senior figuur in die Iran-gesteunde Houthi’s wat in Israel se veldtog teen die groep dood is. Die Houthi’s het na die aanvalle op 7 Oktober, in solidariteit met die Palestyne, Rooi See-skepe geteiken, en verskeie missiele op Israel afgevuur.

# En rugby: Die Pumas het die Westelike Provinsie gister met 39-13 in hul Curriebeker-wedstryd in Kaapstad geklop en bly sodoende in die stryd vir die uitspeelrondes. WP het teen rustyd ‘n skrale voorsprong van 10-7 gehad, met die Pumas onder druk vir die grootste deel van die eerste helfte. Die besoekers het egter na rustyd vlam gevat en vinnig ‘n voorsprong van 22-10 opgebou. Die aanslag het voortgeduur met die Pumas wat altesaam vyf drieë teenoor die tuisspan se een gedruk het. Die Pumas is nou 5de op die puntelys, met WP heelonder in die 8ste plek.

Bly ingeskakel vir meer nuus……………….