Nuus 07:00

BULLETIN 27 Augustus 7 vm

Goeiemôre. Ek is……..

In die bulletin:

# Die DA kritiseer die polisie se voortdurende mislukking om effektiewe polisiëring te verskaf
# Die ANC veroordeel die geweld in die e-taxi- en taxibedryf
# En rugby: Die Bok-vroue kan ‘n plek in die Wêreldbeker-kwarteindstryd losspeel met ‘n oorwinning teen Italië

# Die DA sê Statistiek Suid-Afrika se 2024/2025-opname oor bestuur, openbare veiligheid en justisie toon landburgers gaan toenemend gebuk onder geweldsmisdaad. Volgens die opname is diefstal van persoonlike eiendom die mees algemene misdaad wat Suid-Afrikaanse individue raak, maar sowat 70-persent van die slagoffers verkies om nie die misdaad aan te meld nie. Slegs 36,1-persent Suid-Afrikaners voel dis veilig om snags in hulle eie gemeenskappe alleen te loop. Lisa Schickerling van die DA sê die SAPD versuim om doeltreffende polisiëring te bied:

# Sasol sê ‘n Amerikaanse tarief van 30-persent op sy chemiese uitvoere kan 1,4-miljard-rand in verkope beïnvloed. Die hoof- finansiële beampte, Walt Bruns, het gesê versagtingstrategieë sluit in die oordrag van koste aan klante of die herleiding van produkte na Asië. Die uitvoerende hoof, Simon Baloyi, het ook gesê die meeste Amerikaanse verkope word plaaslik vervaardig, wat blootstelling beperk. Sasol het egter, ten spyte van die tarief, ‘n basiese verdienste van 10-rand-60 per aandeel aangeteken vir die jaar wat 30 Junie geëindig het, versterk deur hoër chemiese pryse, kostebeheer en ‘n Transnet-uitbetaling van 4,3-miljard-rand.

# Die ANC veroordeel die voortdurende geweld in die e-taxi- en taxibedryf, insluitend die onlangse moord op die e-taxi-bestuurder Mthokozisi Mvelase by die Maponya Winkelsentrum in Soweto in Gauteng. Die party het ‘n beroep gedoen vir dringende dialoog tussen belanghebbendes en sterker wetstoepassing om stabiliteit te herstel en lewens te beskerm. Die ANC se sekretaris-generaal, Fikile Mbalula, waarsku dat geweld in hierdie sektore openbare orde en dienslewering bedreig. Mbalula het die polisie versoek om ferm op te tree teen die oortreders:

# Iran het wederkerige optrede teen Australië beloof nadat sy ambassadeur, Ahmad Sadeghi, uit die land gesit is. Australië beskuldig Teheran dat hy anti-Semitiese brandstigting in Sydney en Melbourne georkestreer het. Ambassadeur Sadeghi en drie ander amptenare is beveel om Australië binne sewe dae te verlaat. Die Australiese eerste minister, Anthony Albanese, het ook Iran se Rewolusionêre Wag as ‘n terroristegroep verklaar. Iran se ministerie van Buitelandse Sake beskryf Albanese as ŉ swak politikus en sê die beskuldiging teen die land maak geen sin nie.

# Rugby: Die Springbok-vroue se hulpafrigter, Franzel September, sê hulle het goeie momentum in aanloop tot Sondag se tweede Groep D-wêreldbekerwedstryd teen Italië in Engeland. Na hulle oortuigende 66-6-sege teen Brasilië in hul openingswedstryd, sal ŉ oorwinning teen Italië die Suid-Afrikaners onder die top-twee in Groep D plaas en plek in die toernooi se kwarteindronde verseker. September sê hulle onderskat nooit ŉ teenstander nie en Italië sal ŉ uitdaging wees:

# Die finansiële aanwysers: Die rand verhandel teen 17-rand-63-sent teen die dollar, 20-rand-50-sent teen die euro en 23-rand-73-sent teen die pond. Bitcoin verhandel teen 111-duisend-223-dollar. Die prys van goud is drie-duisend-385-dollar-68-sent per fynons en die prys van Brent ruolie 66-dollar-59-sent per vat.

# En ten slotte: KwaZulu-Natal se premier, Thamsanqa Ntuli, stel vandag prins Mangosuthu Buthelezi se rusplek as ŉ provinsiale erfenisterrein bekend. Buthelezi was die stigter van die IVP en een van die Nasionale Vergadering se lede met die langste dienstydperk. Hy is in September 2023 op 95-jarige leeftyd dood. Hy was ook meer as ses dekades die tradisionele Zoeloe- eerste minister. Ntuli sê die bekendstelling is die begin van ŉ driejaar-projek om Buthelezi se ryke nalatenskap te bewaar.

Bly ingeskakel vir meer nuus……………….