Nuus 18:00

BULLETIN 6 Augustus 6 nm

Goeiemiddag. Ek is……..

In die bulletin:

# Die Valke ondersoek ‘n Suid-Afrikaanse man wat as skerpskutter in die Israelse Weermag dien
# Die beleggingsmakelaar Mark Kretzschmar gee homself oor aan die polisie in ‘n bedrogsaak van miljoene rand
# En Olimpiese Spele: ‘n Inheemse groep begin ‘n regsgeding om die Olimpiese stadion in Brisbane te keer

# Die Valke stel ondersoek in na die Suid-Afrikaner Aaron Bayhack se beweerde aansluiting by Israel se elite Spook-eenheid sonder regerings-goedkeuring. Bayhack is een van 21 skerpskutters in die eenheid en word beskuldig dat hy Suid-Afrika se Wet op Buitelandse Militêre Bystand oortree en deelgeneem het aan gevegte in Gaza wat volgens berigte gelei het tot burgerlike ongevalle. Die saak beklemtoon die groeiende kommer oor Suid-Afrikaners wat sonder toestemming in buitelandse magte dien, wat regsgevolge inhou, insluitend inhegtenisneming.

# Die Johannesburg-gebaseerde beleggingsmakelaar, Mark Kretzschmar, het homself aan die polisie oorgegee te midde van bewerings dat hy kliënte en kennisse uit miljoene rand bedrieg het. Kretzschmar, wat vroeër PCS Holdings bedryf het, word ondersoek na verskeie klagtes en ‘n voorlopige ondersoek deur die Gedragsowerheid vir die Finansiële Sektor oor ongelisensieerde beleggingsbedrywighede. Hy sal na verwagting môre in die Landdroshof in Alexandra verskyn terwyl ondersoekbeamptes voortgaan om die volle omvang van die beweerde finansiële wangedrag vas te stel.

# Sakeliga het die Hooggeregshof in Pretoria se uitspraak verwelkom wat die afdwing van swart ekonomiese bemagtingskriteria in lisensie-aansoeke vir lugdienste omkeer. Uitvoerende hoof, Piet le Roux, sê die Raad vir Lugdienste-lisensiëring het onregmatig opgetree met die toepassing van transformasiereëls wat nie deur die wet vereis word nie. Die groep het ook beperkings op die elektroniese opneem van lisensie-aansoeke teengestaan. Hy sê Sakeliga wil hê dat die hof hierdie gebruike ongrondwetlik moet verklaar:

# Die sekretaris-generaal van die ANC, Fikile Mbalula, het die SAKP se besluit gekritiseer om onafhanklik aan verkiesings deel te neem en noem dit verdeldend en skadelik vir die alliansie. Hy het op ‘n nuuskonferensie na die ANC se nasionale uitvoerende komitee-vergadering gesê die SAKP se stap ondermyn eenheid en lei die aandag af van die gedeelde doelwit om die land se uitdagings aan te pak. Hy het die party aangemoedig om dit te heroorweeg en waarsku dat onenigheid binne die drieparty-alliansie die progressiewe beweging verder kan fragmenteer:

# Olimpiese Spele: ‘n Australiese inheemse groep het met regstappe begin teen die oprigting van ‘n stadion met 63-duisend sitplekke vir 2032 se Spele in Brisbane. Die Yagara Magandjin Aboriginal Corporation het die federale minister van Omgewingsake versoek om die park tot kultureel-belangrike gebied te verklaar en teen ontwikkeling te beskerm. Die groep sê die park is die tuiste van oer-oue bome, geskiedkundige kuns, baie belangrike ekostelsels en moontlik voorvaderlike oorskot. Die stadion is veronderstel om die opening- en sluitingseremonie van 2032 se Olimpiese en Paralimpiese Spele aan te bied.

# En die finansiële aanwysers: Die rand verhandel teen 17-rand-78-sent teen die dollar, 20-rand-68-sent teen die euro en 23-rand-68-sent teen die pond. Bitcoin verhandel teen 113-duisend-987-dollar. Die prys van goud is drie-duisend-375-dollar-69-sent per fynons en die prys van Brent-ruolie is 67-dollar-91-sent per vat.

Bly ingeskakel vir meer nuus……………….