Nuus 13:00

BULLETIN NUUSAGENTSKAP 3 Januarie 1 nm

Goeiemiddag. Ek is……..

In die bulletin:

# Verdagtes aangekeer vir die driedubbele moord op Nuwejaarsdag in Guguletu
# ActionSA in Limpopo verwelkom die hofbevel wat ‘n EEF-raadslid in aanhouding laat bly
# En, krieket: Pakistan op dag een in Sydney uitgeboul

# Twee verdagtes is aangekeer in verband met drie moorde in Gugulethu, Kaapstad, op Nuwejaarsdag. Die verdagtes, van 26 en 36, is in Goodwood en Blue Downs vasgetrek. Hulle word ook van poging tot moord aangekla. Drie mans is in die voorval dood en een ernstig gewond. Polisiewoordvoerder Novela Potelwa sê speurders ondersoek die motief vir die skietery:

# ActionSA in Limpopo verwelkom die uitspraak van die Landdroshof in Seshego wat die EFF-raadslid, Jacob Seshoka, saam met sy vier mede-beskuldigdes, in polisieaanhouding laat bly totdat sy formele borgtogaansoek volgende maand aangehoor word. Die party beskryf dit as ‘n oorwinning vir die gemeenskap van Moletjie en Bloedrivier. Kgoshi Letsiri Phaahla van ActionSA sê Seshoka is betrap met gesteelde vuurwapens en ammunisie toe hy Donderdag in Bloedrivier in hegtenis geneem is in verband met inbraak en veediefstal:

# ‘n Nuwe reëling deur die Britse regering, wat beperkings plaas op internasionale studente wat familielede die land inbring, het omstredenheid in die Parlement uitgelok. Die wet is van toepassing op die meeste internasionale studente, met die uitsondering  van dié wat nagraads studeer of regeringsbeurse het. Die minister van Binnelandse Sake, James Cleverly, steun die maatreël en wys op die regering se toewyding tot die verlaging van die aantal immigrante en die versterking van die land se grense. Die opposisie se skadu-minister van Binnelandse Sake, Yvette Cooper, betoog die maatreëls is nie voldoende nie en hanteer slegs oppervlakkige kwessies.

# Krieket: Pakistan het besluit om eerste te kolf in die derde toets teen Australië in Sydney. Nadat albei aanvangskolwers vir ‘n nulletjie uitgehaal is, het die besoekers herstel en 313 op die telbord geplaas met Mohammad Rizwan en Aamer Jamal se tellings in die 80’s. Australië se kaptein, Pat Cummins, het vyf paaltjies platgetrek. Die tuisspan het daarna dag een afgesluit met ses lopies sonder die verlies van ‘n paaltjie. David Warner kolf in sy laaste toets voor sy uittrede. Cummins hoop die 37-jarige Warner maak die geleentheid die moeite werd:

# Die finansiële aanwysers: Die rand verhandel teen 18-rand-69-sent teen die dollar, 20-rand-45-sent teen die euro en 23-rand-61-sent teen die pond. Bitcoin verhandel teen 45-duisend-308-dollar-18-sent. Die prys van goud is twee-duisend-en-58-dollar-55-sent per fynons en die prys van Brent ruolie 74-dollar-93-sent per vat.

# Ten slotte: Die regering van Bangladesh het weerlig nou ook as ‘n natuurramp verklaar nadat sterftes weens mense wat raakgeslaan word, skerp gestyg het. Owerhede, insluitend die Amerikaanse Ruimte-agentskap, NASA, en die Verenigde Nasies, skryf die toename aan sterftes weens weerlig toe aan meer stormweer weens klimaatsverandering. Die direkteur-generaal van Bangladesj se departement van Rampbestuur, Mijanur Rahman, sê die meeste slagoffers van weerlig is boere wat tydens die nat moeson-seisoen hul landerye bewerk. Hy sê aardeverwarming, omgewingsveranderings en leefpatrone is die grootste bydraende faktore tot die stygende sterftesyfer weens weerlig. 

Bly ingeskakel vir meer nuus……………….