Nuus 16:00
BULLETIN 15 April 4 nm
Goeiemiddag. Ek is……..
In die bulletin:
# AfriForum Jeug vra ‘n ondersoek na ‘n beweerde sangoma-seremonie in ‘n koshuis op die Potchefstroom-kampus
# Die Maldive verbied Israelse besoekers op die eilandgroep
# En seeperdjies kan nou weer in Knysna besigtig word
# AfriForum Jeug eis ‘n ondersoek nadat ‘n tradisionele geneser-seremonie in ‘n vrouekoshuis op die Potchefstroomse kampus van die Noordwes-Universiteit uitgevoer is. Die groep sê die voorval, wat bestaan het uit harde gille en voorvaderlike gebede, het Saterdagaand gebeur en die ander studente ontstel. Yvonne Gerber van AfriForum Jeug wil hê die universiteit moet duidelike reëls instel oor kulturele praktyke in koshuise, berading verskaf en personeel oplei om studente se bekommernisse beter te hanteer:
# ‘n Soektog is van stapel gestuur na ‘n groep verdagtes wat gister twee sakemanne in Midrand in Gauteng gekaap en ontvoer het. Die slagoffers is op ‘n perseel wat motors verhuur, gekaap en na bosse langs die R21 geneem, waar hulle gedwing is om hul bankkaarte en PIN-nommers te oorhandig. Die polisiewoordvoerder Athlenda Mathe sê hulle gesteelde Range Rover is later in Tembisa gevind:
# Die Maledive het Israeli’s verbied om die luukse toeriste-eilandgroep te besoek uit solidariteit met die Palestyne. President Mohamed Muizzu het die wetgewing bekragtig kort nadat dit vandag deur die Parlement goedgekeur is en die verbod tree onmiddellik in werking. Die klein Islamitiese republiek van een-duisend-192 strategies-geleë koraaleilandjies, is bekend vir sy afgeleë wit sandstrande, vlak turkoois-strandmere en Robinson Crusoe-styl wegbreke.
# Sokker: Die Wêreld-sokkerbeheerliggaam FIFA oorweeg ’n uitspeelwedstryd tussen Los Angeles en Club América van Mexiko vir ’n plek in die Klub-Wêreldbekertoernooi in Amerika. Dit volg na die diskwalifisering van die Mexikaanse Club León weens die reëls oor multi-klubeienaarskap. FIFA se president, Gianni Infantino, sê hulle behoort die uitslag van León se appèl by die Hof van Arbitrasie vir Sport binne die volgende paar weke te hê en sal dan ‘n besluit neem. Daar sal 32 spanne aan die toernooi deelneem wat vanaf 14 Junie tot 13 Julie plaasvind.
# Die finansiële aanwysers: Die rand verhandel teen 18-rand-91-sent teen die dollar, 21-rand-45-sent teen die euro en 25-rand-3-sent teen die pond. Bitcoin verhandel teen 85-duisend-603-dollar. Die prys van goud is drie-duisend-219-dollar-28-sent per fynons en die prys van Brent-ruolie 63-dollar-93-sent per vat.
# En ten slotte: SANParke het sy opvoedkundige vertoontenk by die Thesen-eilandkantoor in Knysna suksesvol met bedreigde Knysna-seeperdjies hervul. Hierdie projek beoog om openbare bewustheid te verhoog en bewaring te ondersteun van hierdie unieke spesie, wat slegs in die Knysna-, Swartvlei- en Keurbooms-riviermondings voorkom. Die hervulling het die bekendstelling van ses jong volwasse seeperdjies uit die Knysna-riviermonding ingesluit om genetiese verskeidenheid te verhoog en die tenk se broeibevolking te versterk. Besoekers word aangemoedig om meer te leer oor die bedreigings waarmee hulle te kamp het, insluitend habitat-vernietiging en besoedeling.
Bly ingeskakel vir meer nuus……………….