Eko-minuut 13:30

BULLETIN NUUSAGENTSKAP 20 Januarie 1:30 nm

Goeiemiddag. Hier is jou Eko-minuut:

# ‘n Studie in Nature Energy het onthul dat slegs sewe-persent van groenwaterstofprojekte in die wêreld uitgevoer is. Dit bied uitdagings vir Suid-Afrika se Billike Energieoordrag-beleggingsplan omdat die hoë koste ŉ belangrike struikelblok is. Die koste van groenwaterstof is tans tussen 94- en 113-rand per kilogram teenoor 28-rand per kilogram vir gryswaterstof. Navorsers van die Potsdam-instituut vir navorsing oor klimaatsgevolge voorspel die koste kan teen 2037 daal. Kenners stel subsidies, duidelike regulasies en koolstof-prysvasstelling voor om mededingendheid te bevorder.

# Navorsers aan die Universiteit van Essex en Edinburgh sê ‘n kommerwekkende verband bestaan tussen lugbesoedeling en kardiovaskulêre gesondheid in Afrika. Meer as 70-persent van sterftes wêreldwyd wat met lugbesoedeling verband hou, is weens hart- en bloedvatsiektes. In Afrika is kardiovaskulêre sterftes tans die tweede grootste oorsaak van sterftes naas oordraagbare siektes. Kenners sê Afrika se lugbesoedelingsvlak is drie maal hoër as in hoë-inkomstelande en ingrypings in openbare gesondheid moet daarom dringend uitgebrei word.

# En ten slotte: ŉ Rekordstyging in die atmosfeer se koolstofdioksiedvlakke in 2024 het pogings ontspoor om aardverwarming tot 1,5-grade Celsius te beperk. Volgens die Verenigde Koninkryk se Weerkantoor het koolstofdioksiedvlakke tussen 2023 en 2024 met byna 3,6 deeltjies per miljoen molekules toegeneem tot ŉ nuwe hoogtepunt van meer as 424. Dit word toegeskryf aan fossielbrandstof-vrystellings, swakker koolstof-sinksels, veldbrande en die uitwerking van die El Niño-natuurverskynsel. Daar is verlede week bevestig dat 2024 die warmste op rekord was.

Bly ingeskakel vir meer nuus……………….