Nuus 13:00

BULLETIN NUUSAGENTSKAP 17 Januarie 1 nm

Goeiemiddag. Ek is……..

In die bulletin:

# AZAPO sê die regering moet aanspreeklikheid aanvaar vir die Stilfontein-tragedie
# Tshwane ontvang nog ’n gekwalifiseerde oudit-mening
# En, tennis: Alcaraz en Zverev is deur na die Australiese Ope se laaste 16

# Die Azanian People’s Organisation sê die Stilfontein-tragedie het die regering van nasionale eenheid se sogenaamde ware kleure gewys. Die regerings-geleide reddingspoging by die Buffelsfontein-goudmyn in Noordwes het tussen Maandag en Woensdag daartoe gelei dat 246 onwettige mynwerkers gered en in hegtenis geneem, en 87 liggame na die oppervlak gebring is. AZAPO se woordvoerder, Jabu Rakwena, sê weens die manier waarop die mynwerkers dood is, is die regering volgens hom skuldig aan menseregteskendings:

# Die DA sê leefstyloudits is nodig vir senior misdaadintelligensiebeamptes te midde van kommer oor korrupsie. Dit volg nadat 1,3-miljoen-rand uit ‘n kantoor in Oos-Londen in die Oos-Kaap gesteel is en 22,7-miljoen-rand bestee is aan ‘n luukse hotel vir kantoorruimte in Pretoria. Die DA-lid, Lisa Schickerling waarsku korrupsie en wanfunksionering binne misdaadintelligensie-geledere stel openbare veiligheid in gevaar en belemmer misdaadbekampingspogings:

# Die Stad Tshwane het ‘n gekwalifiseerde oudit vir die 2023/’24-boekjaar ontvang. Volgens die ouditeur-generaal, Tsakane Maluleke, is nie alle krediteur-fakture op die stelsel ingevoer nie, wat dui op ‘n stilstand in finansiële beheer en interne tekortkominge. Ten spyte van verbeterings is daar kwessies soos 3,6-miljard-rand se skuld wat nie opgeteken is nie en 2,3-miljard-rand se onregmatige uitgawes. Volgens MoneyWeb plaas Maluleke klem op korrupsie in inkomstebestuur en diensleweringsteikens wat nie bereik is nie. Dit sluit die herstel van rioolpype en slaggate in. Sy vra kulturele en strukturele veranderinge in die metro.

# Tennis: Die Spanjaard Carlos Alcaraz het die eerste keer ‘n stel afgestaan in vanjaar se Australiese Ope, maar Nuno Borges van Portugal in vier stelle geklop en deurgedring na die laaste 16. Die 21-jarige probeer om die jongste speler ooit in die mans-enkelspel te word wat die loopbaan-Grand Slam voltooi. Die Duitser Alexander Zverev is ook deur na die vierde ronde nadat hy Jacob Fearnley van Brittanje verslaan het. Alcaraz erken hy probeer anders speel om die skare te vermaak:

# Die finansiële aanwysers: Die rand verhandel teen 18-rand-71-sent teen die dollar, 19-rand-26-sent teen die euro en 22-rand-80-sent teen die pond. Bitcoin verhandel teen 102-duisend-119-dollar. Die prys van goud is twee-duisend-708-dollar-71-sent per fynons en die prys van Brent-ruolie 80-dollar-57-sent per vat.

# En ten slotte: ‘n Australiese sosiale media-beïnvloeder word aangekla van die vergiftiging van haar babadogtertjie om skenkings en volgelinge te lok. Die vrou van Queensland het beweer sy deel die verhaal van haar kind se stryd met ‘n terminale siekte. Dokters het in Oktober onraad bemerk toe die baba in die hospitaal opgeneem is. Die 34-jarige vrou is na ‘n ondersoek aangekla van marteling, vergiftiging, kinderuitbuiting op sosiale media en bedrog. Sy het meer as 700-duisend-rand ingesamel deur GoFundMe-skenkings, wat die webwerf nou probeer terugbetaal. Die vrou verskyn vandag in die hof.

Bly ingeskakel vir meer nuus……………….