Nuus 18:00

BULLETIN NUUSAGENTSKAP 10 Desember 6 nm

Goeiemiddag. Ek is……..

In die bulletin:

# FlySafair gee passasiers krediet vir vertraagde vlugte weens die OR Tambo-lughawe se brandstoftekort
# Binnelandse Sake verleng sy kantoorure vir die feestyd
# En, tennis: Matteo Berrettini word aangestel as tennisambassadeur van Saoedi-Arabië se Openbare Beleggingsfonds

# FlySafair het passasiers wat geraak is weens ‘n brandstofstelselonderbreking op die OR Tambo Internasionale Lughawe in Gauteng krediet gegee vir gister se beduidende vlugvertragings van meer as drie-uur. Die lugredery het die Lughawensmaatskappy van Suid-Afrika gevra vir ‘n terugbetaling van passasierskoste weens die ontwrigting. FlySafair wag op ‘n antwoord, maar het klante wat geraak is intussen krediet gegee in die vorm van reisbewyse vir toekomstige vlugte. Passasiers sal hul koopbewyse binne 24-uur per e-pos ontvang. Die lugredery verseker klante van sy verbintenis om hoë diensstandaarde te handhaaf.

# Die Departement van Binnelandse Sake verleng sy kantoorure daagliks met twee uur van vandag tot 20 Desember. Kantore sal nou om ses-uur saans sluit in plaas van vier-uur middae om kliënte oor die feestyd by te staan. Die verlengde ure geld ook van 2 tot 5 Januarie. Minister Leon Schreiber sê hierdie verlengde ure vorm deel van die departement se pogings om burgers te help om hul dokumente betyds te kry vir die vakansie:

# Suid-Afrika se vervaardigingsproduksie het in Oktober met 0,8-persent gestyg en die grootste groei was in die petroleum-, chemikalieë- en voedselsektore. Die motorvoertuigsektor het egter met 16,6-persent gedaal. Juan-Pierre Terblanche van Statistieke Suid-Afrika sê vervaardigingsverkope het vanaf September met 2,3-persent gestyg, maar het in die laaste drie maande met 1,2-persent gedaal en die motorvoertuigsektor het bygedra tot die afname:

# Die DA beklemtoon die dringende behoefte aan ingryping in tronke weens ‘n krisis met smokkelary. Woordvoerder Kabelo Kgobisa-Ngcabawith, sê daar is binne 12 maande beslag gelê op byna een-duisend-kilogram dwelms, 41-duisend selfone en duisende wapens. Sy doen ‘n beroep op die minister van Korrektiewe Dienste, Pieter Groenewald, om die kwessie na die kabinet te verwys om kwesbare gevangenisse, onvoldoende sekerheid en misdadige bedrywighede reg te stel:

# Tennis: Die Italiaanse speler, Matteo Berrettini, as aangestel as tennisambassadeur van Saoedi-Arabië se Openbare Beleggingsfonds, met die opdrag om die volgende geslag spelers voor te berei en die sport wêreldwyd te bevorder. Die soewereine welvaartsfonds het sy belang in die sport onlangs uitgebrei. Hy het die naamvennoot van die wêreldranglyste vir mans en vroue geword, asook ‘n vennoot by verskeie toernooie. Reuters berig die Spaanse legende, Rafael Nadal, wat onlangs uitgetree het, is vroeër vanjaar in ʼn soortgelyke rol by die Saoedi-tennisfederasie aangestel.

# En die finansiële aanwysers: Die rand verhandel teen 17-rand-87-sent teen die dollar, 18-rand-81-sent teen die euro en 22-rand-80-sent teen die pond. Bitcoin verhandel teen 97-duisend-913-dollar. Die prys van goud is twee-duisend-683-dollar-2-sent per fynons en die prys van Brent-ruolie 72-dollar-2-sent per vat.

Bly ingeskakel vir meer nuus……………….