Nuus 08:00

BULLETIN 10 Desember 8 vm

Goeiemôre. Ek is……..

In die bulletin:

# Fikile Mbalula sê SAKP-lede in die regering sal nie verwyder word nie
# Die Lughawensmaatskappy hou vol hy betaal sy fakture betyds
# En die DA vra vir proaktiewe oplossings om plaasaanvalle in die Vrystaat te bekamp

# Die ANC se sekretaris-generaal Fikile Mbalula sê hulle gaan nie SAKP-lede wat as ministers dien en ander wat in die regering werk, uit hul poste verwyder nie omdat dit nie polities korrek sal wees nie. Die SAKP het verlede week aangekondig hy gaan in 2026 sonder die ANC aan die plaaslike verkiesing deelneem. Die party het sy ontevredenheid en kommer oor die regering van nasionale eenheid uitgespreek. Mbalula het herhaal die ANC sal die gevolge van die SAKP se besluit bestudeer:

# Die Lughawemaatskappy van Suid-Afrika sê die blote bestaan van ‘n eis van ʼn diensverskaffer beteken nie voorwaardelike aanspreeklikheid of selfs rede vir likwidasie nie. Dit volg nadat hofdokumente verlede week ingedien is waarin ʼn diensverskaffer aansoek doen vir ACSA se likwidasie omdat hy nie die gekontrakteerde diensverskaffer betaal het vir dienste gelewer nie. Die maatskappy word ook beskuldig dat hy vals finansiële verslae publiseer. ACSA sê hy betaal alle geldige en onbetwiste fakture wat ontvang word vir goedere en dienste gelewer, betyds.

# Die DA vra vir proaktiewe oplossings teen die toenemende aantal plaasaanvalle in die Vrystaat. Die party veroordeel die gewelddadige plaasaanval oor die naweek op ʼn gesin van Rouxville en het medelye betuig met die slagoffer se familie. DA-woordvoerder Werner Pretorius waarsku ʼn onderbemande Suid-Afrikaanse Polisiediens kan nie sulke aanvalle doeltreffend voorkom nie:

# Die polisie het die 26-jarige Luigi Mangione gearresteer in verband met die moord verlede week in New York op UnitedHealthcare se uitvoerende hoof, Brian Thompson. Hy is gister in Altoona, Pennsilvanië, aangekeer op vuurwapen-aanklagte nadat hy by ʼn McDonald’s opgemerk is. Die polisie sê Mangione sal binnekort aangekla word van moord. Pennsilvanië se goewerneur, Josh Shapiro, sê sommige opmerkings oor hierdie saak, veral aanlyn, is ontstellend omdat party mense die moordenaar loof eerder as veroordeel:

# Sokker: Die skeidsregtersliggaam, Professional Game Match Officials Limited, het die Premierliga-beampte, David Coote, afgedank. Hy is verlede maand geskors nadat ʼn video op sosiale media die rondte gedoen het waarin hy na bewering neerhalende opmerkings maak oor Liverpool en voormalige bestuurder, Jurgen Klopp. Op ʼn tweede video snuif Coote na bewering ʼn wit poeier tydens die Europese Kampioenskap vroeër vanjaar. Die liggaam sê ʼn deeglike ondersoek het bevind Coote het sy kontrak se bepalings oortree en hy kan nie langer die pos beklee nie.

# En die finansiële aanwysers: Die rand verhandel teen 17-rand-81-sent teen die dollar, 18-rand-79-sent teen die euro en 22-rand-69-sent teen die pond. Bitcoin verhandel teen 96-duisend-382-dollar-6-sent. Die prys van goud is twee-duisend-667-dollar-79-sent per fynons en die prys van Brent ruolie 71-dollar-84-sent per vat.

Bly ingeskakel vir meer nuus……………….