Nuus 07:00

BULLETIN 10 Desember 7 vm

Goeiemôre. Ek is……..

In die bulletin:

# Minister Gwarube sê die regering is daarop ingestel om van puttoilette ontslae te raak
# Business Leadership SA sê die hervormings in die energiesektor lewer positiewe resultate
# En die VSA waarsku ISIS kan voordeel trek uit die situasie in Sirië

# Die minister van Basiese Onderwys, Siviwe Gwarube, sê die vervanging van puttoilette is nie net ‘n veiligheidskwessie nie, maar gaan oor waardigheid. Sy het Maandag die Veilige Skole-toepassing bekendgestel as deel van pogings om puttoilette by skole landwyd te vervang. Altesaam 652 skole in die land gebruik nog puttoilette. Gwarube sê die toepassing is ŉ tegnologiese deurbraak wat ŉ billike, veilige en waardige leeromgewing vir skoolkinders sal skep:

# Business Leadership South Africa sê alhoewel Suid-Afrika die uitwerking van hervorming in die energiesektor begin sien, lê daar nog harde werk voor in die water-, vervoer- en logistieke sektore. Die organisasie sê sakevertroue is besig om in die lig van veranderinge te verbeter, en die Nasionale Vervolgingsgesag gaan voort om sy vermoë te herwin. Die uitvoerende hoof, Busiswe Mavuso sê daar is nog werk om te doen, want die bruto binnelandse produk se teleurstellende groeisyfer vir die derde kwartaal wys dele van die ekonomie sukkel steeds.

# Die president van die Suid-Afrikaanse Reserwebank, Lesetja Kganyago, beklemtoon die belangrikheid om beleid met omsigtigheid te vorm te midde van onsekerheid en so latere berou te voorkom. Hy het op CNBC die behoefte beklemtoon om op toekomstige data te fokus en nie op neigings in die verlede nie. Die sentrale bank het die terugkoopkoers onlangs tot 7,75-persent verlaag nadat inflasie in Oktober tot 2,8-persent afgekoel het. Kganyago wys egter daarop dat tariewe beperkend bly en vra ‘n laer inflasieteiken om Suid-Afrika se globale mededingendheid te verbeter.

# Ondersoeke duur voort nadat die Gautengse polisie die afgelope week twee sakemanne gered en sewe ontvoerders in hegtenis geneem het. Saterdag is ‘n Chinese sakeman in Springs, Ekurhuleni, ontvoer. ‘n Multi-dissiplinêre span het die verdagtes binne 24-uur opgespoor, twee aangekeer en die slagoffer gered. Verlede Sondag is ‘n sakeman in Wierdabrug, Centurion, ontvoer. Die polisiewoordvoerder, Amanda van Wyk, sê daar is beslag gelê op vuurwapens, voertuie en selfone toe hy gered is:

# Amerika se minister van Verdediging, Lloyd Austin, waarsku ISIS kan probeer om die situasie in Sirië uit te buit. Amerika het Sondag meer as 75 ISIS-teikens in sentraal-Sirië getref nadat president Bashar al-Assad ná meer as 50 jaar se diktatorskap beheer in Sirië verloor het. Austin sê die vinnige omverwerping van die Siriese regime was vir die internasionale gemeenskap ŉ verrassing. Hy sê die aanvalle was deel van die sending om ISIS te ontwrig, te verswak en te verslaan:

# Krieket: Die ervare Australiese snelbouler Josh Hazlewood kan terugkeer vir die derde toets teen Indië wat Saterdag in Brisbane begin. Hy het die tweede toets in Adelaide weens ‘n sy-besering misgeloop. Die Baggy Green het binne drie dae met tien lopies gewen om die reeks van vyf wedstryde gelykop te maak. Hazlewood is vervang deur Scott Boland, wat vyf paaltjies geneem het. Australië en Indië, saam met die voorloper op die punteleer, Suid-Afrika, is die enigste spanne wat nog die eindstryd van die Wêreldtoetskampioenskap kan haal.

# En die finansiële aanwysers: Die rand verhandel teen 17-rand-81-sent teen die dollar, 18-rand-79-sent teen die euro en 22-rand-70-sent teen die pond. Bitcoin verhandel teen 98-duisend-5-dollar-90-sent. Die prys van goud is twee-duisend-662-dollar-96-sent per fynons en die prys van Brent ruolie 71-dollar-97-sent per vat.

Bly ingeskakel vir meer nuus……………….