Sportnuus 12:30

BULLETIN SPORTNUUS 9 Desember 12.30 nm

Goeiemiddag. Ons kyk na die jongste sportnuus en uitslae:

# Ons begin vandag met rugby: Die Blitsbokke het Frankryk 26-14 verslaan om die Kaapstadse Sewestoernooi die eerste keer sedert 2015 te wen. Donovan Don, Zain Davids, Shilton van Wyk en David Brits het die gashere se drieë gedruk. Fidji het die bronsmedalje gewen nadat hulle Spanje in die uitspeelstryd om derde plek 47-10 geklop het. In die vrouekompetisie is Nieu-Seeland as kampioen gekroon nadat sy die VSA in die eindstryd 26-12 geklop het. Frankryk het die bronsmedalje verower nadat sy Australië 17-14 verslaan het.

# Vervolgens, krieket: Engeland se vrouespan het Suid-Afrika met ses paaltjies verslaan in die tweede eendagwedstryd in Durban en die reeks van drie is nou gelykop. Die gasvroue is vir 135 uitgeboul toe die middel-orde ineengestort en hulle vyf paaltjies vir vier lopies verloor het. Engeland het die teiken in 24 boulbeurte bereik. Charlie Dean is die sewende Engelse speler in die geskiedenis en derde vrou wat ‘n driekuns in eendagkrieket behaal. Die Protea-kaptein, Laura Wolvaardt, sê hulle het net nie genoeg lopies op die telbord gehad nie:

# ‘n Kykie na gholf: Die Amerikaner Johannes Veerman het sy tweede Europese toertitel ingepalm deur die Nedbank-uitdaagreeks by Sun City met een hou te wen. Die 32-jarige het met 69 afgesluit vir ‘n totaal van vyf onder baansyfer. Aldrich Potgieter van Suid-Afrika het een hou na hom in die tweede plek geëindig, saam met Matthew Jordan van Engeland en die Fransman Romain Langasque. Die verdedigende kampioen, Max Homa, het met 75 afgesluit – gesamentlik 14de en vyf houe agter die wenner. Veerman sê sy oorwinning was onbeskryflik:

Die wêreld-nommer-een, Scottie Scheffler, het intussen ‘n briljante seisoen afgesluit deur sy Hero World Challenge-titel in die Bahamas suksesvol te verdedig. Die Amerikaner het ses houe voor Tom Kim van Suid-Korea geëindig met sy landgenoot Justin Thomas in die derde plek. Dit is Scheffler se negende titel van die jaar, wat die rekord ewenaar. Dit sluit die Amerikaanse Meesters en Olimpiese goud in.

# Ons sluit af met motorsport: Lando Norris het die seisoen se laaste Grand Prix in Abu Dhabi gewen en aan McLaren sy eerste Formule Een-vervaardigerstitel in 26 jaar besorg. Die Brit het van die begin af voorgeloop om sy vierde sege van die seisoen op te raap. Carlos Sainz en Charles Leclerc van Ferrari was onderskeidelik tweede en derde. Lewis Hamilton was vierde in sy laaste wedren vir Mercedes en sy spanmaat, George Russel, vyfde. Norris sê dis ʼn ongelooflike prestasie vir die span:

Bly ingeskakel vir meer nuus……………….