Nuus 12:00

BULLETIN NUUSAGENTSKAP 9 Desember 12 nm

Goeiemiddag. Ek is……..

In die bulletin:

# Trevor Manuel word aangestel in ‘N VN-instelling om die wêreldwye skuldkrisis aan te pak
# Maatskaplike Ontwikkeling repatrieer ‘n kind wie se Suid-Afrikaanse ma in Mauritius in die tronk is
# Em gholf: Scottie Scheffler behaal sy negende titel van die jaar en ewenaar die rekord

# Die voormalige minister van Finansies, Trevor Manuel, is aangestel in ‘n groep kundiges van die Verenigde Nasies met die taak om beleidsoplossings vir die wêreldwye skuldkrisis te vind. Die groep sal daadwerklike beleidsoplossings bevorder en politieke en openbare steun aanwakker om die skuldkrisis op te los. Die groep se bevindings sal tydens 2025 se Befondsing vir Ontwikkelings-konferensie gedeel word. Ontleders prys Manuel se kundigheid, maar kritiseer die Suid-Afrikaanse regering oor die onderbenutting van plaaslike talent, terwyl die land sy eie ekonomiese uitdagings ondervind.

# Die minister van Binnelandse Sake, Leon Schreiber, sê sy departement het ‘n tree gegee op sy reis na digitale hervorming met die bekendstelling van sy nuwe e-werwingsplatform. Die aanlyn stelsel stel werksoekers in staat om vir poste aansoek te doen sonder die sleurwerk van papiervorms. Schreiber sê die departement beweeg na ʼn toekoms waar dienste digitaal toeganklik is en bedrieglike praktyke uitgeroei word:

# ‘n Afvaardiging van die Departement van Maatskaplike Ontwikkeling vertrek vandag na Mauritius om ‘n vyfjarige kind te gaan haal wie se Suid-Afrikaanse ma in die land in die tronk is. Die vrou is in Mei 2019 vir dwelmhandel aangekeer terwyl sy swanger was. Die departement het sedert 2015 22 kinders gerepatrieer wat in ander lande in nood verkeer het. Die departement se woordvoerder, Mathembu Futshane, sê die afvaardiging sal na verwagting Vrydag met die kind terugkeer:

# Die sekretaris-generaal van die Verenigde Nasies, António Guterres, sê die einde van president Basjar al-Assad se diktatoriale regime beteken die mense van Sirië kan ‘n geskiedkundige geleentheid aangryp om ‘n bestendige en vreedsame toekoms te bou. Rebellemagte het verklaar dat sy regering gister geëindig het nadat hulle die hoofstad, Damaskus, ingeneem het. Al-Assad en sy gesin het na Rusland gevlug. Guterres sê dit is noodsaaklik om te verseker dat politieke oorgang almal insluit en dat dit voldoen aan die wettige behoeftes van die mense van Sirië.

# Gholf: Die wêreld-nommer-een, Scottie Scheffler, het ‘n briljante seisoen afgesluit deur sy Hero World Challenge-titel in die Bahamas suksesvol te verdedig. Die Amerikaner het ses houe voor Tom Kim van Suid-Korea geëindig, met sy landgenoot Justin Thomas in die derde plek. Dit is Scheffler se negende titel van die jaar, wat die rekord ewenaar. Dit sluit die Amerikaanse Meesters en Olimpiese goud in. Hy sê dit was ‘n taamlik onwerklike jaar:

# En die finansiële aanwysers: Die rand verhandel teen 17-rand-88-sent teen die dollar, 18-rand-95-sent teen die euro en 22-rand-82-sent teen die pond. Bitcoin verhandel teen 99-duisend-617-dollar. Die prys van goud is twee-duisend-647-dollar-97-sent per fynons en die prys van Brent-ruolie 71-dollar-76-sent per vat.

Bly ingeskakel vir meer nuus……………….