Nuus 11:00

BULLETIN 6 Desember 11 vm

Goeiemôre. Ek is……..

In die bulletin:

# AfriForum dreig met regstappe indien onteiening sonder vergoeding in wetgewing vervat word
# Die EFF is bekommerd oor die mynbousektor in Suid-Afrika
# En agt verdagtes is doodgeskiet in ’n geveg met die polisie in KwaZulu-Natal

# AfriForum waarsku hulle sal regstappe doen om privaat eiendomsreg te beskerm indien president Cyril Ramaphosa die Wetsontwerp op Onteiening onderteken of indien die ANC die Grondwet wysig om onteiening sonder vergoeding toe te laat. AfriForum se woordvoerder, Ernst van Zyl, sê hulle sal enige pogings teenstaan om privaat eiendomsreg te vernietig ​​en sal die regering voor die hof daag indien hulle voortgaan met onteiening sonder vergoeding:

# Die EFF sê hy waarsku deurgaans oor die ongebreidelde uitbreiding van onwettige mynsindikate wat in hedendaagse slawerny ontaard het. Drie liggame is reeds uitgehaal terwyl meer as 100 onwettige mynwerkers steeds ondergronds vasgekeer is in ‘n uitgewerkte myn in Sabie, Mpumalanga. Nog ses onwettige mynwerkers het intussen uit ‘n ou mynskag in Stilfontein, Noordwes, gekom. Die EFF sê die infiltrasie van onwettige goud in formele markte laat dringende vrae ontstaan oor die wettigheid en oorsig van die mynbousektor.

# Agt verdagtes is dood in ‘n skietgeveg met die polisie naby Richardsbaai aan die KwaZulu-Natalse noordkus. Hulle was vermoedelik op pad om ‘n sakeonderneming te beroof toe die polisie hulle op die John Ross-snelweg voorgekeer het. ‘n Polisiewoordvoerder Robert Netshiunda, sê die verdagtes word ook verbind met transitorooftogte in die provinsie:

# Die Verenigde Nasies se sekretaris-generaal, António Guterres, doen ‘n beroep vr ‘n dringende einde aan gevegte in Sirië na die onlangse toename in vyandighede in die voortslepende burgeroorlog. Siriese rebelle het beheer oorgeneem van ‘n tweede groot stad, Hamas, nadat die Weermag vroeër die week sy soldate onttrek het. Meer as ‘n halfmiljoen mense is dood sedert die burgeroorlog in 2011 uitgebreek het na president Basjar al-Assad se gewelddadige onderdrukking van vreedsame pro-demokratiese betogings. Guterress vra ‘n ernstige dialoog:

# Padwedlope: Inskrywings vir volgende jaar se 98ste Comrades-marathon in KwaZulu-Natal het vir ‘n beperkte tydperk heropen. Die vorige inskrywingsproses het gesluit toe die inskrywingsperk van 23-duisend bereik is. Die Comrades-marathonvereniging se waarnemende wedloopbestuurder, Alain Dalais, sê slegs ‘n duisend inskrywings is beskikbaar van vandag tot Maandag om middernag, of tot die beskikbare getal bereik word.

# En die finansiële aanwysers: Die rand verhandel teen 18-rand-3-sent teen die dollar, 19-rand-6-sent teen die euro en 22-rand-99-sent teen die pond. Bitcoin verhandel teen 98-duisend-134-dollar-53-sent. Die prys van goud is twee-duisend-639-dollar-53-sent per fynons en die prys van Brent-ruolie 72-dollar-4-sent per vat.

Bly ingeskakel vir meer nuus……………….