Nuus 09:00

BULLETIN 6 Desember 9 vm

Goeiemôre. Ek is……..

In die bulletin:

# Paul Mashatile sê die Tesourie oorweeg maatreëls om te verseker departemente betaal munisipaliteite
# Die Hooggeregshof stel die verwydering van die kandidatelys tersyde van lede van die MK-party
# En die goewerneur van Kalifornië reik ‘n noodproklamasie uit na ‘n aardbewing

# Adjunkpresident Paul Mashatile sê die Nasionale Tesourie oorweeg om departemente wat munisipaliteite geld skuld, se begrotings te sny om skuld te vereffen. Die minister van Finansies, Enoch Godongwana, het in Augustus onthul dat staatsinstansies munisipaliteite saam 18,6-miljard skuld vir eiendomsbelasting en diensgelde. In Gauteng alleen het die staat teen die einde van Julie 3,5-miljard-rand geskuld met provinsiale regeringsdepartemente wat vir die meeste hiervan aanspreeklik was. Mashatile het aan die Nasionale Raad van Provinsies gesê die wanbetaling lê munisipaliteite lam:

# Cosatu verwelkom die ondertekening van die Wetsontwerp op Spoorveiligheid deur president Cyril Ramaphosa en sê dit moes lankal gebeur het. Die nuwe wet maak voorsiening vir die regulering van spoorwegveiligheid en die voortsetting van die Spoorveiligheidsreguleerder as ‘n instelling. Mathew Parks van Cosatu sê hulle verwelkom die progressiewe doelstellings en bepalings in die wet wat ten doel het om die dikwels swak gesondheids- en veiligheidsaspekte van die land se passasiers- en vragspoornetwerk op te knap:

# Die MK-party sê hy neem kennis van die Wes-Kaapse Hooggeregshof se uitspraak wat sy besluit om lede van die All African Alliance Movement van sy kandidatelys te verwyder en te skors, tersyde stel. Dit beteken die lede moet weer aangestel word en dié wat in hul plek aangestel is, moet verwyder word. Die MK-party is gekritiseer omdat hy verkose verteenwoordigers verwyder het om plek te maak vir mense soos John Hlophe, wat as amptelike opposisieleier in die Parlement dien. Die party sê hy bestudeer die uitspraak.

# ‘n Aardbewing met ‘n omvang van 7,0 het aan die kus van Noord-Kalifornië voorgekom wat gelei het tot ‘n tsoenami-waarskuwing vir minstens 5,3-miljoen mense aan die Weskus. Die waarskuwing is kort daarna opgehef. Dertig na-skokke is aangemeld met meer as tienduisend mense wat sonder krag in die Humboldt-distrik gelaat is. Die aardbewing was een van die grootste in Kalifornië in onlangse jare. Die goewerneur van Kalifornië, Gavin Newsom, sê amptenare fokus nou op die nagevolge van die aardbewing:

# Rugby: Die Springbok-losvoorspeler Phepsi Buthelezi sê hy is tevrede om mee te dring om ‘n plek in die Haaie se opdrafspan, want die Durbanse span het baie diepte. Hy het sy enigste toets vir die Bokke vanjaar gespeel. Buthelezi sê hy gee nie om in watter losvoorspeler-posisie hy speel nie, maar verkies om die nommer agt-trui te dra. Hy meen die mededinging onder die losvoorspelers is goed vir almal. Die Haaie speel môre in Durban teen Exeter Chiefs in die eerste ronde van die Kampioenebeker-reeks.

# En die finansiële aanwysers: Die rand verhandel teen 18-rand-2-sent teen die dollar, 19-rand-6-sent teen die euro en 22-rand-98-sent teen die pond. Bitcoin verhandel teen 97-duisend-600-dollar-84-sent. Die prys van goud is twee-duisend-642-dollar-29-sent per fynons en die prys van Brent ruolie 72-dollar-6-sent per vat.

Bly ingeskakel vir meer nuus……………….